जिल्हा बँक निवडणुकीत महायुतीची आघाडी! शिवसेनेच्या दोन, भाजपच्या एका उमेदवाराची बिनविरोध निवड निश्चित

हॅलो जनता | प्रतिनिधी

जळगाव : जळगाव जिल्हा मध्यवर्ती सहकारी बँकेच्या निवडणुकीत महायुतीने सुरुवातीलाच आघाडी घेतली आहे. पारोळा, एरंडोल आणि भुसावळ या तीन सोसायटी मतदारसंघांतील उमेदवारांची बिनविरोध निवड निश्चित झाली आहे. यामध्ये शिवसेनेच्या दोन, तर भाजपच्या एका उमेदवाराचा समावेश असून, तिन्ही जागांवर महिला उमेदवारांनी बाजी मारली आहे.    जिल्हा बँकेच्या निवडणुकीसाठी उमेदवारी अर्ज दाखल करण्याची प्रक्रिया पूर्ण झाल्यानंतर या तीन मतदारसंघांतील निवडणुकीचे चित्र स्पष्ट झाले. प्रतिस्पर्धी उमेदवार नसल्याने संबंधित उमेदवारांची बिनविरोध निवड निश्चित झाली आहे.

पारोळा, एरंडोलमध्ये शिवसेनेचे प्रतिनिधित्व

पारोळा सोसायटी मतदारसंघातून माजी आमदार चिमणराव पाटील यांच्या पत्नी नलिनी चिमणराव पाटील यांची बिनविरोध निवड निश्चित झाली आहे. तर एरंडोल सोसायटी मतदारसंघातून आमदार अमोल पाटील यांच्या पत्नी मृणाल अमोल पाटील यांचीही बिनविरोध निवड निश्चित झाली आहे. या दोन्ही निवडींमुळे पाटील कुटुंबांचे जिल्हा बँकेतील राजकीय प्रतिनिधित्व कायम राहणार आहे.

भुसावळमध्ये भाजपला संधी

भुसावळ सोसायटी मतदारसंघातून राज्यमंत्री तथा भाजप नेते संजय सावकारे यांच्या पत्नी रजनीताई संजय सावकारे यांची बिनविरोध निवड निश्चित झाली आहे. त्यांच्या निवडीमुळे भुसावळ मतदारसंघातून भाजपला संचालकपद मिळण्याचा मार्ग मोकळा झाला आहे. या तीन जागांवरील बिनविरोध निवडीमुळे जिल्हा बँकेच्या निवडणुकीत महायुतीने आपले खाते उघडले आहे. आता उर्वरित मतदारसंघांमध्ये कोणते उमेदवार निवडणूक रिंगणात राहतात आणि निवडणुकीचे पुढील चित्र कसे असेल, याकडे संपूर्ण जिल्ह्याचे लक्ष लागले आहे.