💥 ब्रेकिंग : महसूल प्रशासन हतबल, भर पावसात वाळू माफियांचा उच्छाद…

हॅलो जनता न्यूज, एरंडोल :- जळगाव जिल्ह्यातील गिरणा नदी परिसरात सुरू असलेल्या अवैध वाळू उपशामुळे पर्यावरणास मोठा धोका निर्माण झाला असून नदीच्या किनाऱ्यांचे झपाट्याने सपाटीकरण होत असल्याने ग्रामस्थ आणि पर्यावरणप्रेमींमध्ये गंभीर चिंता व्यक्त केली जात आहे. वाळू माफिया जेसीबीच्या साह्याने रात्रंदिवस मोठ्या प्रमाणावर वाळू उपसा करत आहेत. या अवैध उपशामुळे नदीच्या पर्यावरणीय साखळीवर परिणाम होत असून नदीनाल्यांचे प्रदूषणही वाढत आहे. एकीकडे भर पावसात वाळू उपसा सुरू असताना दुसरीकडे मात्र प्रशासन हतबल झाल्याचे पाहायला मिळत आहे.

महसूल प्रशासन : “अवैध गौण खनिज उत्खनन विरोधी पथक” नावापुरतेच?

वैजनाथ टाकरखेडा, कढोली, दापोरी व नागदुल्ली या गिरणा नदी किनारी पट्ट्यात अवैध वाळू वाहतुकीवर नियंत्रण ठेवण्यासाठी “अवैध गौण खनिज उत्खनन विरोधी पथक” नियुक्त करण्यात आले आहे. मात्र हे पथक बहुतांश वेळा जागेवर हजर नसते. त्यामुळे वाळू माफियांना मोकळे रान मिळत असून त्यांच्या कारवायांना कोणाचा तरी राजकीय आश्रय असल्याची शंका ग्रामस्थांकडून व्यक्त केली जात आहे.

महसूल विभागाचा अडचणीतला कारभार, स्थानिक लोकप्रतिनिधींचा देखील त्रास…

महसूल विभागाकडून काहीवेळा अवैध वाळू वाहतुकीवर छापे टाकले जात असले तरी त्यांच्यासमोर अनेक अडचणी उभ्या राहतात. माफियांची पकडलेली वाळू वाहने सोडवण्यासाठी स्थानिक लोकप्रतिनिधींना फोन करून दबाव आणला जातो. कारवाई केली तर राजकीय रोष पत्करावा लागतो, तर कारवाई टाळल्यास ग्रामस्थ आणि पर्यावरणप्रेमींनी नाराजी व्यक्त केली जाते. त्यामुळे महसूल विभाग ‘इकडे आड तर तिकडे विहीर’ अशा कोंडीत सापडल्याचे बोलले जाते.

महसूल प्रशासन हतबल, पर्यावरणीय धोका वाढला

वाळू उपशामुळे नदीच्या प्रवाहाचा नैसर्गिक समतोल बिघडत आहे. पाण्याचा साठा कमी होण्याची भीती असून शेती, पिण्याच्या पाण्याचा प्रश्न गंभीर होऊ शकतो. तसेच नद्यांच्या काठावर होणारी धूप, भूजलपातळी घटणे आणि जैवविविधतेला फटका बसणे हे परिणामही दिसू लागले आहेत.

महसूल प्रशासनाकडे ग्रामस्थांची मागणी…

ग्रामस्थांनी प्रशासनाने केवळ कागदी पथके न पाठवता प्रत्यक्ष, सतत आणि कठोर निगराणी ठेवावी, असा सूर लावला आहे. वाळू माफियांवर राजकीय दबावाला बळी न पडता तातडीने कारवाई व्हावी, तसेच नदी आणि पर्यावरण रक्षणासाठी विशेष यंत्रणा कार्यरत व्हावी, अशी मागणी नागरिकांकडून होत आहे. या पार्श्वभूमीवर, गिरणा नदीचे संवर्धन व अवैध वाळू उपशावर आळा घालण्यासाठी प्रशासन कितपत ठोस भूमिका घेते, याकडे सर्वांचेलक्ष लागले आहे.

इतर महत्वाच्या बातम्या…

💥 ब्रेकिंग : पेट्रोल भरताना काळजी घ्या अन्यथा… तुमची होऊ शकते फसवणूक…

💥 ब्रेकिंग : विद्यार्थ्यांच्या सुरक्षिततेसाठी महाराष्ट्र स्टुडंट युनियन आक्रमक, सर्व शाळांमध्ये सीसीटीव्ही लावण्याची मागणी

💥 ब्रेकिंग : बोदवडकरांचा पाणी प्रश्न मिटणार, पाणीपुरवठा योजनेचा भूमिपूजन सोहळा उत्साहात संपन्न