🚨 ब्रेकिंग : पाचोरा नगरपालिकेच्या नगराध्यक्ष पदासाठी भाजप उमेदवार सुचेता वाघ यांनी दाखल केला उमेदवारी अर्ज

हॅलो जनता न्यूज, पाचोरा (प्रतिनिधी) – पाचोरा नगरपालिकेच्या नगराध्यक्ष पदासाठी आज भारतीय जनता पक्षातर्फे माजी आमदार दिलीप वाघ यांच्या पत्नी सुचेता दिलीप वाघ यांनी मोठ्या जल्लोषात व शक्ती प्रदर्शनासह उमेदवारी अर्ज दाखल केला. शहरातील आठवडे बाजार, पंचमुखी हनुमान मंदिर परिसरासह प्रमुख मार्गांवरून निघालेल्या भव्य रॅलीमुळे शहरात उत्साहाचे वातावरण निर्माण झाले होते.

सुचेता वाघ यांच्या उमेदवारी अर्जाच्या निमित्ताने भाजपच्या शक्तीचे प्रदर्शन पाहायला मिळाले. पारंपरिक ढोल-ताशे, भगवे झेंडे आणि कार्यकर्त्यांच्या घोषणांनी संपूर्ण शहर दणाणून गेले. महिलांसह युवा कार्यकर्त्यांची मोठी उपस्थिती लक्षणीय होती.

उमेदवारी अर्ज दाखल करण्याच्या कार्यक्रमास भाजपचे जिल्हाध्यक्ष राधेश्याम चौधरी यांची प्रमुख उपस्थिती होती. यावेळी आमदार दिलीप वाघ, भाजप नेते अमोल शिंदे, वैशाली सूर्यवंशी, प्रताप पाटील, संजय वाघ यांच्यासह पाचोरा शहरातील सर्व भाजप नगरसेवक आणि पदाधिकारी मोठ्या संख्येने उपस्थित होते.

या प्रसंगी जिल्हाध्यक्ष राधेश्याम चौधरी यांनी पाचोरा शहर विकासासाठी सुचेता वाघ या सक्षम उमेदवार असून आगामी निवडणुकीत भाजपला प्रचंड बहुमत मिळेल, असा विश्वास व्यक्त केला. तर आमदार दिलीप वाघ यांनी नागरिकांना विकास आणि पारदर्शक कारभाराचे आश्वासन देत सुचेता वाघ यांच्या पाठीशी भक्कमपणे उभे राहण्याचे आवाहन केले.

उमेदवारी अर्ज दाखल सोहळ्यामुळे संपूर्ण शहरात निवडणुकीचे वातावरण तापले असून भाजपकडून दाखवण्यात आलेले हे शक्ती प्रदर्शन आगामी निवडणुकीत महत्त्वपूर्ण ठरणार असल्याची राजकीय वर्तुळात चर्चा आहे.

इतर महत्वाच्या बातम्या…

🚨 ब्रेकिंग : मुस्लिम मतांचे गणित : चोपडा शहरात शिवसेना शिंदे गटाची मोठी खेळी यशस्वी होणार का?

🚨 ब्रेकिंग: भूषण वाघ यांनी प्रभाग क्र. १ मधून भरला उमेदवारी अर्ज

🚨 ब्रेकिंग: भडगाव नगरपालिकेच्या निवडणुकीत शिंदे सेनेच्या नाराज पदाधिकाऱ्यांच्या भाजप संपर्कात