🚨 ब्रेकिंग : अतिवृष्टी व पूरग्रस्त शेतकऱ्यांना आर्थिक मदत जाहीर, कोणत्या जिल्ह्याला किती निधी पहा….

desk3 weeks ago

0 344 1 minute read

हॅलो जनता न्यूज, मुंबई : जून २०२५ ते ऑगस्ट २०२५ या कालावधीत राज्यातील विविध जिल्ह्यांमध्ये झालेल्या अतिवृष्टी व पूरामुळे शेतीपिकांचे मोठ्या प्रमाणावर नुकसान झाले. या पार्श्वभूमीवर राज्य शासनाने शेतकऱ्यांना मदतीचा दिलासा देत एकूण रु. १३३९,४९,२५,००० (रूपये एक हजार तीनशे एकोणचाळीस कोटी, एकोणपन्नास लक्ष, पंचवीस हजार फक्त) इतक्या निधीच्या वितरणास मंजुरी दिली आहे.

शेतकरी मदत : निविष्ठा अनुदान स्वरूपात मदत

अतिवृष्टी, पूर किंवा चक्रीवादळ यांसारख्या नैसर्गिक आपत्तीमुळे शेतकऱ्यांचे नुकसान झाल्यास पुढील हंगामात पिक उत्पादनासाठी उपयोगी पडावे म्हणून निविष्ठा अनुदान स्वरूपात मदत दिली जाते. एका हंगामात शेतकऱ्यांना एकदाच विहित दराने मदत देण्यात येते. त्याच अनुषंगाने या जीआरद्वारे मंजुरी मिळालेला निधी वितरित केला जाणार आहे.

शेतकरी मदत निधी थेट शेतकऱ्यांच्या खात्यात

शासनाने स्पष्ट केले आहे की हा निधी DBT पोर्टलद्वारे (Direct Benefit Transfer) थेट शेतकऱ्यांच्या बँक खात्यात जमा केला जाईल. यासाठी लाभार्थ्यांची माहिती विहित नमुन्यात संगणकीय प्रणालीवर भरून, संबंधित अधिकाऱ्यांकडून काळजीपूर्वक पडताळणी करून मान्यता दिली जाईल.

चालू हंगामात यापूर्वी वितरित करण्यात आलेल्या मदतीच्या निधीमध्ये या प्रस्तावातील निधीचा समावेश नसल्याची दक्षता घेण्याचे निर्देश शासनाने दिले आहेत. तसेच, एका हंगामात शेतकऱ्यांना फक्त एकदाच मदत देण्यात यावी आणि लाभार्थ्यांना मदत देताना दुबार नोंद होणार नाही याची जिल्हाधिकारी व तहसिल कार्यालयाने विशेष काळजी घ्यावी, असे आदेश देण्यात आले आहेत.

शेतकरी मदत : जिल्हानिहाय वाटपाची माहिती

शासनाच्या मंजुरीनंतर संबंधित विभागांनी जिल्हानिहाय बाधित शेतकऱ्यांची संख्या आणि त्यांना मिळणाऱ्या निधीचे विवरण तयार केले आहे. विभागवार आकडेवारीनुसार कोणत्या जिल्ह्यात किती शेतकरी बाधित झाले आणि त्यांना किती निधी मंजूर झाला, हे विवरण संबंधित विभाग व जिल्हाधिकारी कार्यालयात पाहता येणार आहे. या निर्णयामुळे अतिवृष्टी व पुरामुळे हतबल झालेल्या शेतकऱ्यांना दिलासा मिळणार असून, आगामी हंगामातील शेतीसाठी लागणाऱ्या निविष्ठा खरेदीस मदत होणार आहे.