💥 ब्रेकिंग: एनडीआरएफच्या निकषानुसार तीन पट मदत मिळावी, आमदार किशोर पाटील यांची मुख्यमंत्र्यांकडे मागणी…

हॅलो जनता न्यूज, जळगाव, दि. २७ (प्रतिनिधी) – पाचोरा-भडगाव मतदारसंघात दिनांक १६, २२ व २३ सप्टेंबर रोजी झालेल्या अतिवृष्टीमुळे शेतकऱ्यांचे अतोनात नुकसान झाले आहे. खरीप हंगाम पूर्णतः नष्ट झाला असून शेतात उभे असलेले पीक सडून जात आहे. शेतकऱ्यांना उत्पन्नाचा कुठलाही आधार उरलेला नाही. या पार्श्वभूमीवर आमदार किशोर पाटील यांनी आज मुख्यमंत्री देवेंद्र फडणवीस यांची जळगाव विमानतळावर भेट घेऊन ओला दुष्काळ जाहीर करून तात्काळ आर्थिक मदत देण्याचे निवेदन सादर केले.

आमदार पाटील यांनी मुख्यमंत्र्यांना दिलेल्या निवेदनात म्हटले आहे की,

१) पाचोरा व भडगाव तालुक्यातील शेतकऱ्यांचे १०० टक्के पिकांचे नुकसान झाले असून शेतजमिनीत पाणी साचल्याने पिके सडत आहेत.

२) पाचोरा येथे १६ सप्टेंबर रोजी ११४.८ मिमी, २२ सप्टेंबर रोजी १४७.८ मिमी व २३ सप्टेंबर रोजी तब्बल १३९.३ मिमी पाऊस झाला. तालुक्याचा सरासरी पाऊस १३६.४ मिमी असून त्यापेक्षा २५७.८ मिमी जास्त पाऊस झाला. २३ सप्टेंबरपर्यंतची पर्जन्यमानाची टक्केवारी १८९ टक्क्यांवर गेली आहे.

३) भडगाव तालुक्यात देखील २३ सप्टेंबर रोजी ९०.७० मिमी इतका पाऊस झाला असून शासनाच्या पर्जन्यमापक नोंदीनुसार ही आकडेवारी अधिकृत आहे.

या अतिवृष्टीमुळे शेतकऱ्यांचे केवळ पिकेच नाही तर शेतीपयोगी साधने, विहिरी, ठिबक, पाईपलाइन, फळबागा, बांध, बंधारे, पूल यांचेही नुकसान झाले आहे. दुध-दुभती जनावरे, बैल, गाई, म्हशी, बकरी, कोंबड्या मोठ्या प्रमाणावर वाहून गेल्या. अनेक शेतकऱ्यांची घरे उद्ध्वस्त झाली असून शहर व गावांतील व्यापाऱ्यांचे दुकानांमधील मालसुद्धा पाण्यात बुडून नष्ट झाला आहे.

आमदार किशोर पाटील यांची नेमकी मागणी काय?

आमदार पाटील म्हणाले की, “गेल्या दोन वर्षांपासून नैसर्गिक आपत्तींचा तडाखा बसलेल्या शेतकऱ्यांना अजूनही पूर्वीच्या नुकसानीची पूर्ण भरपाई मिळालेली नाही. अशा स्थितीत सप्टेंबर महिन्यातील अतिवृष्टीने शेतकरी अक्षरशः उद्ध्वस्त झाला आहे. ११ सप्टेंबर २०१९ रोजी पश्चिम महाराष्ट्रातील चार जिल्ह्यांसाठी जसे निकष लागू करून एनडीआरएफमधून तीन पट मदत मिळाली होती, त्याचप्रमाणे पाचोरा-भडगाव मतदारसंघातील शेतकऱ्यांनाही तातडीने मदत मिळावी.”

शेतकऱ्यांची दयनीय अवस्था लक्षात घेता पाटील यांनी मुख्यमंत्री फडणवीस यांच्याकडे तात्काळ ओला दुष्काळ जाहीर करून शेतकऱ्यांना तीन पट आर्थिक मदत मिळावी, अशी ठाम मागणी केली आहे.

इतर महत्वाच्या बातम्या…

💥श्री संत ज्ञानेश्वर विद्यालयात कन्या पूजनाचा अनोखा उपक्रम

💥 ब्रेकिंग : मुख्यमंत्री फडणवीस धुळे जिल्ह्याच्या दौऱ्यावर, काय घोषण करणार….

💥 ब्रेकिंग : यावल येथील प्रभारी पशुवैद्यकीय अधिकाऱ्याचा संशयास्पद मृत्यू, कुजलेला मृतदेह घरात आढळल्याने खळबळ