🚍पाचोरा ते तुळजापूर थेट एस.टी. बससेवा सुरू, भाविकांची दीर्घकाळची मागणी पूर्ण

हॅलो जनता न्यूज, पाचोरा प्रतिनिधी : पाचोरा-भडगाव मतदारसंघातील भाविक भक्तांची अनेक वर्षांची मागणी अखेर पूर्ण झाली आहे. कुलस्वामिनी श्री क्षेत्र तुळजापूरकडे थेट जाणारी एस.टी. बससेवा आता पाचोरा येथून कायमस्वरूपी सुरू झाली आहे. आमदार किशोर आप्पा पाटील यांच्या सातत्यपूर्ण पाठपुराव्यामुळे ही सेवा शक्य झाली असून, भाविकांमध्ये समाधानाचे वातावरण आहे.

पाचोरा भडगाव मतदारसंघातील हजारो भाविक दरवर्षी तुळजाभवानीच्या दर्शनासाठी तुळजापूरला जातात. मात्र थेट बससेवा उपलब्ध नसल्याने भाविकांना लांबचा मार्ग शोधावा लागत होता किंवा खासगी वाहनांचा आधार घ्यावा लागत होता. त्यामुळे भाविकांची गैरसोय वाढली होती. यावर तोडगा म्हणून अनेक वर्षांपासून पाचोरा-तुळजापूर थेट बस सुरू करण्याची मागणी होत होती.

पाचोरा तुळजापूर बस सेवा : असे आहे वेळापत्रक

या मागणीची गांभीर्याने दखल घेत आमदार किशोर पाटील यांनी राज्य परिवहन महामंडळाशी सातत्याने पाठपुरावा केला. अखेर त्यांच्या प्रयत्नांना यश आले असून, पाचोरा बसस्थानकातून दररोज सकाळी ६ वाजता ही बस सुटेल. तुळजापूर येथे मुक्कामी थांबून दुसऱ्या दिवशी संध्याकाळी ६ वाजता हीच बस परत पाचोराकडे येईल, असे अधिकृत वेळापत्रक जाहीर करण्यात आले आहे.

या निर्णयामुळे पाचोरा-भडगाव परिसरातील भाविकांना मोठा दिलासा मिळाला आहे. आता सोयीस्कर व सुरक्षित प्रवासामुळे अधिकाधिक भाविकांना तुळजाभवानीच्या दर्शनाचा लाभ घेता येणार आहे. या सेवेमुळे धार्मिक पर्यटनालाही चालना मिळणार असल्याचे मत व्यक्त होत आहे.

इतर महत्वाच्या बातम्या….

उडान दिव्यांग प्रशिक्षण केंद्रातील विद्यार्थ्यांच्या कला पाहून दादा आणि भाऊ भारावले….

सावखेडा बुद्रुक येथे “एक गाव एक देवी”, ३१ वर्षांची परंपरा कायम

🚨 ब्रेकिंग : मत चोरीविरोधात जळगावात काँग्रेसच्या स्वाक्षरी अभियानाला सुरूवात