🛑 ब्रेकिंग : शेतकऱ्यांच्या मदतीसाठी ₹2215 कोटी मंजूर, “या” जिल्ह्यांना मिळाली सर्वाधिक मदत

हॅलो जनता न्यूज, मुंबई : राज्यातील शेतकऱ्यांना अतिवृष्टीचा मोठा फटका बसला असून, त्यांच्या पिकांसह घरे व पशुधनाचे मोठे नुकसान झाले आहे. या पार्श्वभूमीवर मुख्यमंत्री देवेंद्र फडणवीस यांच्या अध्यक्षतेखाली मंत्रालयात आज (मंगळवार) झालेल्या मंत्रिमंडळ बैठकीत महत्त्वाचे निर्णय घेण्यात आले. बैठकीनंतर मुख्यमंत्री फडणवीस यांनी पत्रकार परिषदेत माहिती देताना सांगितले की, नुकसानग्रस्तांना त्वरित मदत पोहोचवण्यासाठी राज्य सरकार युद्धपातळीवर कार्यरत आहे.

मुख्यमंत्री म्हणाले की, “नुकसान भरपाईचे निकष शिथिल करण्यात आले असून, मदतीसाठी निधीची कमतरता भासू दिली जाणार नाही. आतापर्यंत 31 लाख 64 हजार शेतकऱ्यांना ₹2215 कोटींची मदत मंजूर झाली आहे. त्यापैकी ₹1829 कोटी रुपयांचा निधी जिल्हा स्तरावर वितरितही करण्यात आला आहे. पुढील 8 ते 10 दिवसांत शेतकऱ्यांच्या बँक खात्यांत ही रक्कम जमा होईल.”

पूरग्रस्त भागांतील पंचनामे पूर्ण होताच तातडीचे आर्थिक सहाय्य दिले जात आहे. एकत्रित शासन आदेशाची प्रतीक्षा न करता, पंचनामे येताच स्वतंत्र आदेश काढण्यात येत असल्याची माहितीही मुख्यमंत्री यांनी दिली. स्थानिक प्रशासनाला मदतीसाठी पूर्ण स्वातंत्र्य देण्यात आले असून, मदतकार्य कुठेही अडखळणार नाही, असेही त्यांनी स्पष्ट केले.

राज्यातील धाराशिव, अहिल्यानगर, जळगाव, सोलापूर, बीड आणि परभणी या जिल्ह्यांत अतिवृष्टी व पूरामुळे मोठे नुकसान झाले आहे. या भागांत राष्ट्रीय आपत्ती प्रतिसाद दल (NDRF) आणि राज्य आपत्ती प्रतिसाद दल (SDRF) च्या तब्बल 17 तुकड्या बचाव आणि मदतकार्यात गुंतल्या आहेत. नागरिकांना सुरक्षित स्थळी हलवण्यासाठी हेलिकॉप्टरची मदत घेण्यात आली आहे. तसेच स्थलांतरितांसाठी अन्न, पाणी आणि निवाऱ्याची व्यवस्था करण्यात आली आहे.

यासंदर्भात केंद्र सरकारकडे मदतीचा प्रस्तावही पाठवण्यात येणार आहे, पण त्याआधीच राज्य सरकारने तातडीने मदत सुरू केली असल्याचे मुख्यमंत्री फडणवीस यांनी सांगितले.

दरम्यान, हवामान विभागाने 27 आणि 28 सप्टेंबर रोजी पुन्हा अतिवृष्टीचा इशारा दिला आहे. यासाठी प्रशासन पूर्ण सज्ज असून, नागरिक आणि शेतकऱ्यांनी आवश्यक ती खबरदारी घ्यावी, असे आवाहन मुख्यमंत्री फडणवीस यांनी केले. मुख्यमंत्री देवेंद्र फडणवीस हे उद्या प्रत्यक्ष पूरग्रस्त भागाचा दौरा करून मदतकार्यक्षेत्राची पाहणी करणार आहेत.

इतर महत्वाच्या बातम्या…

🛑 ब्रेकिंग : अधिकारी होण्याचे स्वप्न अपूर्ण, १८ वर्षीय तरुणाचा अपघाती मृत्यू..

🔴 ब्रेकिंग : नशिराबाद ग्रामस्थांचा स्मार्ट मीटरला तिव्र विरोध; आंदोलनाचा इशारा

🔴 ब्रेकिंग : गिरणा धरणाच्या पाणी पातळीत वाढ, सतर्कतेचा इशारा…