💥 ब्रेकिंग : विद्यार्थ्यांच्या सुरक्षिततेसाठी महाराष्ट्र स्टुडंट युनियन आक्रमक, सर्व शाळांमध्ये सीसीटीव्ही लावण्याची मागणी

हॅलो जनता न्यूज, जळगाव :- विद्यार्थ्यांच्या सुरक्षिततेस प्राधान्य देणे ही शिक्षण प्रशासनाची प्रथम जबाबदारी असल्याचे स्पष्ट करत जिल्ह्यातील सर्व प्राथमिक व माध्यमिक शाळांमध्ये तातडीने सीसीटीव्ही कॅमेरे बसविण्याची मागणी महाराष्ट्र स्टुडंट युनियन तर्फे करण्यात आली असून या संदर्भातील निवेदन जिल्हा परिषदेच्या मुख्य कार्यकारी अधिकारी मीनल करनवाल यांना देण्यात आले आहे.

महाराष्ट्र स्टुडंट युनियन : विद्यार्थिनींवर लैंगिक अत्याचाराच्या घटनांमध्ये मोठ्या प्रमाणावर वाढ…

गेल्या काही दिवसांपासून राज्यभरात विद्यार्थिनींवर लैंगिक शोषण व अत्याचाराच्या घटनांची वृत्तपत्रांतून सातत्याने नोंद होत आहे. त्याच्या पार्श्वभूमीवर जळगाव जिल्ह्यातील एकूण ३ हजार २२२ शाळांपैकी अनेक शाळांमध्ये अजूनही सीसीटीव्ही व्यवस्था उपलब्ध नाही. ही बाब गंभीर मानली जात आहे. शिक्षण विभागाने यापूर्वी प्रत्येक शाळेत सीसीटीव्ही बसविणे बंधनकारक केले असून त्याची योग्य देखभाल व महिन्यातून किमान एकदा फूटेज तपासणी करण्याच्या सूचना दिल्या आहेत. मात्र या बाबीकडे शिक्षण विभागाने दुर्लक्ष केल्याचे निदर्शनास आले आहे.

महाराष्ट्र स्टुडंट युनियन : सीसीटीव्ही नसलेल्या शाळांची मान्यता रद्द होणार..

शासनाने स्पष्ट केले आहे की सीसीटीव्ही नसलेल्या शाळांची मान्यता रद्द होऊ शकते. त्यामुळे तात्काळ खालीलप्रमाणे उपाययोजना करण्याची मागणी करण्यात आली आहे –

1. जिल्ह्यातील सर्व शाळांमध्ये तातडीने सीसीटीव्ही कॅमेरे बसविण्याच्या सूचना द्याव्यात.

2. आधीच बसविलेल्या सीसीटीव्ही कॅमेऱ्यांची कार्यक्षमता तपासून नादुरुस्त कॅमेरे दुरुस्त करावेत.

3. महिन्यातून एकदा सीसीटीव्ही फूटेज तपासणी करून त्याची नोंद रजिस्टरमध्ये ठेवावी.

4. विद्यार्थ्यांच्या सुरक्षिततेसंदर्भातील सर्व कार्यवाहीचा लेखी अहवाल नियमितपणे प्राथमिक व माध्यमिक शिक्षण विभागाकडे सादर करावा.

पालक व विद्यार्थ्यांचा विश्वास दृढ करण्यासाठी विद्यार्थ्यांची सुरक्षा ही सर्वोच्च प्राधान्याची बाब असल्याचे निवेदनात नमूद करण्यात आले आहे. तसेच या निवेदनावर शासनाकडून झालेल्या कार्यवाहीचा अहवाल निवेदनकर्त्यास उपलब्ध करून देण्याची मागणीही करण्यात आली आहे. या मागणीचा तत्काळ विचार करावा अन्यथा तीव्र आंदोलनाचा इशारा संघटनेतर्फे देण्यात आला आहे.

इतर महत्वाच्या बातम्या…

💥 ब्रेकिंग : बोदवडकरांचा पाणी प्रश्न मिटणार, पाणीपुरवठा योजनेचा भूमिपूजन सोहळा उत्साहात संपन्न

💥 ब्रेकिंग : विद्यापीठात उद्या राष्ट्रीय क्रीडा दिनानिमित्त विविध कार्यक्रमांचे आयोजन

💥 ब्रेकिंग : मुक्ताईनगरातील भाविक जम्मूत अडकले, आमदार चंद्रकांत पाटील यांनी केला फोन अन्..