🚨 ब्रेकिंग: पाचोरा तालुक्यात शेतकऱ्यांचा आक्रोश, चुकीच्या पंचनाम्यांमुळे अनुदानापासून हजारो शेतकरी वंचित

हॅलो जनता न्यूज, पाचोरा (प्रतिनिधी) : तालुक्यातील शेतकऱ्यांना अवकाळी पावसामुळे प्रचंड नुकसान सहन करावे लागले असताना, प्रशासनाच्या निष्काळजीपणामुळे आणि चुकीच्या पंचनाम्यांमुळे हजारो शेतकऱ्यांना योग्य अनुदान मिळालेले नाही. काही ठिकाणी तर बागायती जमिनींचे जिरायत म्हणून पंचनामे करण्यात आल्याने शेतकऱ्यांना त्यांच्या वास्तविक नुकसानीपेक्षा अतिशय कमी प्रमाणात मदत मिळाल्याचे धक्कादायक चित्र समोर आले आहे.

या अन्यायाविरोधात संतप्त शेतकऱ्यांनी काँग्रेसचे तालुकाध्यक्ष सचिन सोमवंशी यांच्या नेतृत्वाखाली पाचोरा तहसील कार्यालयावर मोर्चा काढून तहसीलदारांना जाब विचारला. तहसीलदार कार्यालयात शेतकऱ्यांचा मोठा आक्रोश उसळला होता.

शेतकऱ्यांचे म्हणणे आहे की, “चाळीसगाव तालुक्यातील बागायतदार शेतकऱ्यांना योग्य बागायती अनुदान मिळाले, मात्र पाचोरा व भडगाव तालुक्यातील शेतकऱ्यांना जिरायतचे पंचनामे करून फसवले गेले. आमचे नुकसान मोठे झाले असून मिळालेले अनुदान अत्यल्प आहे.”

मोर्चादरम्यान शेतकऱ्यांनी प्रशासनाच्या कर्मचाऱ्यांवर अयोग्य कामकाजाचा आरोप करत तत्काळ सुधारणा करण्याची मागणी केली. त्यांनी चेतावणी दिली की, “या चुकीच्या पंचनाम्यांची तपासणी करून सर्व शेतकऱ्यांना योग्य नुकसानभरपाई देण्यात यावी, अन्यथा तीव्र आंदोलन उभारले जाईल.”

यावेळी मोठ्या संख्येने शेतकरी उपस्थित होते. शेतकऱ्यांच्या भावनांना प्रतिसाद देत तहसीलदारांनी सर्व तक्रारींची सखोल चौकशी करून न्याय देण्याचे आश्वासन दिले आहे. स्थानिक प्रशासनाने या गंभीर विषयावर तातडीने तोडगा काढावा, अशी सर्वत्र मागणी होत आहे.

इतर महत्वाच्या बातम्या…

🚨 पाचोरा ब्रेकिंग : भाजपाचा परिवर्तन मेळावा, भाजप नेत्यांच्या भूमिकेकडे लक्ष…

🔴ब्रेकिंग : सावद्यात शिंदेंची शिवसेना स्वबळावर लढणार?

🔴पाचोरा ब्रेकिंग : पाचोऱ्यात आज श्री. बालाजी महाराज रथयात्रा, रथोत्सवाची १९० वर्षाची परंपरा