🛑 ब्रेकिंग : पाचोरा नगरपालिकेची अतिक्रमण हटाव मोहीम : मुख्याधिकारी मंगेश देवरे उतरले रस्त्यावर

हॅलो जनता न्यूज, पाचोरा (गजानन गिरी): शहरातील शिवाजी नगर परिसरातील मुख्य नाल्यावर झालेल्या अतिक्रमणामुळे नाल्याचा नैसर्गिक प्रवाह अडवला गेला होता. त्यामुळे अलीकडील अतिवृष्टीच्या पावसात पाणी नागरिकांच्या घरात शिरले व प्रचंड नुकसान झाले. या पार्श्वभूमीवर पाचोरा नगरपालिकेने अतिक्रमण हटाव मोहीम अधिक तीव्र करत थेट कारवाईला सुरुवात केली आहे.

नगरपालिकेचे मुख्याधिकारी मंगेश देवरे यांच्या नेतृत्वाखाली आज सकाळपासून मोठ्या संख्येने अधिकारी व कर्मचारी रस्त्यावर उतरले. शिवाजी नगर परिसरातील मुख्य नाल्यावर झालेले सर्वच अतिक्रमण हटवण्यात आले. अवैध बांधकाम व अतिक्रमणामुळे नाल्याचा प्रवाह अडवल्याने प्रत्येकवेळी मुसळधार पावसानंतर परिसरातील नागरिकांना मोठा फटका बसत होता. या कारवाईमुळे नाल्याचा नैसर्गिक प्रवाह सुरळीत करण्यास मदत होणार आहे.

यावेळी बोलताना मुख्याधिकारी मंगेश देवरे म्हणाले, “नागरिकांनी नाल्यावर कुठल्याही प्रकारचे अतिक्रमण करू नये. पक्के बांधकाम केल्यामुळे नाल्याचा प्रवाह अडवला जातो व त्याचा फटका शेवटी नागरिकांनाच सहन करावा लागतो. पावसाचे पाणी घरात घुसण्यामागील मोठे कारण हे अतिक्रमणच आहे. त्यामुळे कोणीही नाल्यावर बांधकाम करू नये, अन्यथा कठोर कारवाई केली जाईल.”

नगरपालिकेच्या या मोहिमेमुळे परिसरातील नागरिकांमध्ये दिलासा व्यक्त केला जात आहे. अनेकांनी अतिक्रमण हटाव मोहिमेचे स्वागत केले असून, नाल्याचा प्रवाह सुरळीत केल्यास भविष्यातील पावसात मोठ्या प्रमाणात होणारे नुकसान टाळता येईल, अशी प्रतिक्रिया रहिवाशांकडून मिळाली आहे. पावसात नागरिकांच्या सुरक्षिततेसाठी व शहरातील नाले सुरळीत ठेवण्यासाठी ही मोहीम सतत सुरू राहणार असल्याचे संकेत नगरपालिकेच्या वतीने देण्यात आले आहेत.

इतर महत्वाच्या बातम्या…

🛑 नवरात्रोत्सवात गाळण गावात सप्तश्रृंगी मातेची स्थापना, छत्रपती ग्रुपचे सर्वत्र कौतुक…

🛑 “युवा SPARK-२०२५’ या विद्यापीठस्तरीय इनोव्हेशन स्पर्धेच्या माहितीपत्रकाचे अनावरण

🛑 ब्रेकिंग : शेतकऱ्यांच्या मदतीसाठी ₹2215 कोटी मंजूर, “या” जिल्ह्यांना मिळाली सर्वाधिक मदत