🛑 संताप जनक : मनसे आक्रमक, शाळेची फी भरली नाही म्हणून विद्यार्थी परीक्षेपासून वंचित

हॅलो जनता न्यूज, पाचोरा | प्रतिनिधी – पाचोरा शहरातील शारदा इंग्लिश मीडियम स्कूलमध्ये मानवतेला काळीमा फासणारी धक्कादायक घटना घडली आहे. शाळेतील दोन सख्या भावांना उबेद फिरोज खाटीक (वर्ग ४, वय १० वर्षे) आणि हमजा फिरोज खाटीक (वर्ग २, वय ८ वर्षे) यांची फी थकबाकी असल्याच्या कारणावरून परीक्षेला बसू दिले नाही. ही घटना समजताच स्थानिक नागरिकांमध्ये तीव्र संताप व्यक्त होत असून, महाराष्ट्र नवनिर्माण विद्यार्थी सेनेने (मनविसे) याविरोधात कठोर भूमिका घेतली आहे.

मिळालेल्या माहितीनुसार, या दोन्ही विद्यार्थ्यांच्या आई गंभीर आजाराने त्रस्त असून त्यांना किडनी फेल्युअर आहे. त्यामुळे घरची आर्थिक परिस्थिती अत्यंत हलाखीची बनली आहे. अशा परिस्थितीत विद्यार्थ्यांवर फीचा तगादा लावून त्यांना परीक्षेबाहेर ठेवणे, हे अत्यंत अमानुष कृत्य असल्याची भावना पालकवर्गात निर्माण झाली आहे.

मनसेचा दणका : शिक्षणाधिकाऱ्यांना निवेदन…

या अन्यायाविरोधात मनविसे जिल्हाध्यक्ष श्रीकृष्ण विठ्ठल दुंदुले यांच्या नेतृत्वाखाली पाचोऱ्याचे गटशिक्षणाधिकारी, यांच्याकडे लिखित तक्रार दाखल करण्यात आली. संबंधित शाळा प्रशासनावर कठोर कारवाई करून विद्यार्थ्यांच्या शिक्षणाचा हक्क अबाधित ठेवावा, अशी मागणी मनविसेने केली आहे.

निवेदनात म्हटले आहे की —

> “शिक्षणाचा अधिकार हा प्रत्येक भारतीय मुलाचा जन्मसिद्ध हक्क आहे. फी थकबाकीच्या कारणावरून विद्यार्थ्यांना शिक्षणापासून वंचित ठेवणे हे केवळ अन्यायकारक नव्हे तर संविधानातील कलम 21(A) आणि शिक्षणाचा अधिकार कायद्याचे उल्लंघन आहे. समाजातील गरीब आणि आजारपणामुळे त्रस्त कुटुंबांप्रती शाळांनी संवेदनशीलता दाखवणे ही सामाजिक जबाबदारी आहे.”

मनविसेने यापुढेही अशा प्रकारच्या प्रकरणांमध्ये अन्यायग्रस्त विद्यार्थ्यांना न्याय मिळवून देण्यासाठी ठामपणे उभे राहण्याचा संकल्प व्यक्त केला आहे. या वेळी मनविसे जिल्हाध्यक्ष श्रीकृष्ण दुंदुले, मनसे तालुकाध्यक्ष ज्ञानेश्वर ठाकरे, शहराध्यक्ष ऋषिकेश भोई, मनविसे शहराध्यक्ष निलेश मराठे, शहर सचिव वाल्मीक जगताप तसेच पालक वर्ग आणि मनविसे पदाधिकारी उपस्थित होते.

इतर महत्वाच्या बातम्या…

💥 ब्रेकिंग : 🚆 मध्य रेल्वेचा मोठा निर्णय, दिवाळीत प्रवाशांना मिळणार दिलासा…

🚨 ब्रेकिंग : महाराष्ट्रातील पहिला उमेदवार जाहीर,भडगाव नगरपरिषदेच्या निवडणुकीसाठी शिंदे सेना सज्ज

💥 ब्रेकिंग : मुक्ताईनगरात दरोडा : केंद्रीय राज्यमंत्री रक्षा खडसे यांच्या पेट्रोल पंपावर लूट