हॅलो जनता प्रतिनिधी
सध्या शहरात डेंग्यू, मलेरिया, चिकनगुनिया यांसारख्या साथीच्या आजारांचा धोका वाढण्याची शक्यता निर्माण झाली आहे. विशेषतः साचलेले पाणी, नाले परिसर आणि वाढलेली अस्वच्छता यामुळे डासांचे प्रमाण मोठ्या प्रमाणात वाढले आहे. नगर परिषदेकडून शहरात फवारणीचे काम सुरू असले तरी संपूर्ण शहरात एकाचवेळी मोहीम राबवणे शक्य नसल्याने नागरिकांच्या आरोग्याचा प्रश्न अधिक गंभीर बनत होता. ही परिस्थिती लक्षात घेऊन नगरसेवक विजयकुमार भोसले यांनी तत्काळ पुढाकार घेत प्रभागातील प्रत्येक भागात औषध फवारणी सुरू केली.
नगरसेवक विजयकुमार भोसले यांनी सांगितले की, “नागरिकांचे आरोग्य सर्वांत महत्त्वाचे आहे. प्रशासन आपले काम करत असले तरी परिस्थितीची गंभीरता लक्षात घेऊन आम्ही स्वखर्चातून ही मोहीम हाती घेतली. भविष्यातही गरज पडल्यास अशाच प्रकारे जनहितासाठी काम सुरू राहील.”
ही जनहिताची मोहीम कार्यसम्राट आमदार किशोरआप्पा पाटील यांच्या मार्गदर्शनाखाली यशस्वीरित्या पार पडली. आगामी काळात नगरपरिषदेमार्फत अधिक व्यापक स्तरावर फवारणी मोहीम राबवण्यात येणार असल्याची माहिती ही यावेळी देण्यात आली. तसेच नागरिकांनी परिसर स्वच्छ ठेवून प्रशासनाला सहकार्य करावे, असे आवाहन करण्यात आले.
दरम्यान, प्रभागातील नागरिकांनी या उपक्रमाचे जोरदार स्वागत करत लोकप्रतिनिधींनी केवळ आश्वासने न देता प्रत्यक्ष कृतीतून जनतेच्या आरोग्याची जबाबदारी उचलल्याचे कौतुक केले. प्रभाग क्रमांक ०९ मधील ही मोहीम सध्या शहरात चर्चेचा विषय ठरत आहे.
