पाचोरा येथील कमलेश सोनवणे यांना जिल्हा युवा पुरस्कार.

प्रतिनिधी | पाचोरा
पाचोरा : महाराष्ट्र शासनाच्या वतीने महाराष्ट्र दिनानिमित्त दिल्या जाणाऱ्या जिल्हा स्तरावरील प्रतिष्ठित युवा पुरस्काराने यंदा पाचोरा येथील युवा समाजसेवक कमलेश सोनवणे यांचा सन्मान करण्यात आला. पोलिस कवायत मैदान, जळगाव येथे आयोजित कार्यक्रमात पालकमंत्री गुलाबराव पाटील यांच्या हस्ते हा पुरस्कार प्रदान करण्यात आला.

या प्रसंगी जिल्हाधिकारी रोहन घुगे, जिल्हा परिषद मुख्य कार्यकारी अधिकारी करिश्मा नायर, पोलिस अधीक्षक श्रीकांत धिवरे, जिल्हा क्रीडा अधिकारी जगदीश चौधरी तसेच इतर मान्यवर उपस्थित होते. कमलेश सोनवणे यांनी शिक्षण, आरोग्य, लिंग समानता, क्रीडा व पर्यावरण अशा विविध क्षेत्रांत उल्लेखनीय कार्य केले आहे.

एक प्रभावी युवा चेहरा व व्याख्याता म्हणून त्यांची ओळख असून, नवी दिल्लीतील विज्ञान भवन व भारत मंडपम येथे व्याख्यान देत त्यांनी जळगाव जिल्ह्याचे नाव राष्ट्रीय पातळीवर उंचावले आहे. सध्या ते स्वतःची सामाजिक संस्था चालवत असून केंद्रीय युवा मंत्रालयाच्या ‘मेरा युवा भारत’ उपक्रमात सक्रिय स्वयंसेवक म्हणून कार्यरत आहेत.

पुरस्कार मिळाल्याबद्दल प्रतिक्रिया देताना कमलेश यांनी सांगितले की, या सन्मानामुळे अधिक जोमाने कार्य करण्याची प्रेरणा मिळाली असून, भविष्यात जिल्ह्यातील तरुणांसाठी मोठे काम उभे करण्याचा त्यांचा मानस आहे.

या यशाबद्दल जिल्हा युवा अधिकारी अभिषेक चवरे, उपजिल्हाधिकारी भूषण अहिरे, तहसीलदार विजय बनसोडे, के.सी.ई. शिक्षणसंस्थेचे अध्यक्ष नंदकुमार बेंडाळे तसेच परिसरातील नागरिकांनी त्यांचे अभिनंदन करत पुढील वाटचालीस शुभेच्छा दिल्या आहेत.

सामाजिक क्षेत्रात सोबत काम करण्यास इच्छुकांनी  कमलेश सोनवणे यांच्याशी व्हॉट्सॲपच्या माध्यमातून जोडण्याकरिता ९९६०८४२३६९ ह्या नंबरवर संपर्क करावा. तसेच इन्स्टाग्रामवर @kamlesh4india वर कनेक्ट व्हावे असे आवाहन कमलेश सोनवणे यांनी केले आहे.