शेतकरी-बैलांच्या अतूट नात्याला उजाळा; सजविलेल्या बैलांची गावातून मिरवणूक
हॅलो जनता प्रतिनिधी जगदीश अमृतकर कजगांव
कजगांव : शेतकऱ्यांच्या जीवनातील अत्यंत जिव्हाळ्याचा आणि बैलांप्रती कृतज्ञता व्यक्त करणारा बैलपोळा सण कजगांव येथे पारंपरिक पद्धतीने मोठ्या उत्साहात व आनंदात साजरा करण्यात आला. सणानिमित्त संपूर्ण गावात उत्साहाचे आणि आनंदाचे वातावरण निर्माण झाले होते.
बैलपोळ्याच्या निमित्ताने शेतकऱ्यांनी आपल्या लाडक्या बैलांना सकाळी स्वच्छ आंघोळ घालून त्यांची पूजा केली. त्यानंतर बैलांना रंगीबेरंगी झूल, फुलांचे हार, गोंडे तसेच विविध आकर्षक दागिने व सजावटीच्या साहित्याने सजविण्यात आले. सजलेल्या बैलांचे रूप पाहण्यासाठी नागरिकांनी मोठी गर्दी केली होती.
दुपारनंतर सजविलेल्या बैलांची गावातून पारंपरिक पद्धतीने मिरवणूक काढण्यात आली. ढोल-ताशांचा गजर, पारंपरिक वाद्यांचा निनाद आणि ‘बळीराजा’च्या जयघोषाने संपूर्ण परिसर दुमदुमून गेला. शेतकरी, युवक तसेच बालकांनी उत्स्फूर्तपणे मिरवणुकीत सहभाग घेतला.
बैल हा शेतकऱ्याच्या शेतीकामातील महत्त्वाचा साथीदार मानला जातो. वर्षभर शेतकऱ्याच्या खांद्याला खांदा लावून शेतीची कामे करणाऱ्या बैलांप्रती कृतज्ञता व्यक्त करण्याची परंपरा बैलपोळ्याच्या माध्यमातून जपली जाते. त्यामुळे आधुनिक काळातही या सणाचे महत्त्व कायम असल्याचे यावेळी दिसून आले.
कजगांवमध्ये पारंपरिक संस्कृती, ग्रामीण जीवनशैली आणि शेतकरी-बैलांचे अतूट नाते यांचा सुंदर संगम बैलपोळ्याच्या निमित्ताने अनुभवायला मिळाला. दिवसभर गावात उत्साहाचे वातावरण होते.
