🚨 ब्रेकिंग : शहीद सीआरपीएफ जवान अनिल बोरसे यांच्यावर खेडगाव नंदीचे येथे शासकीय इतमामात अंत्यसंस्कार

हॅलो जनता न्यूज, पाचोरा प्रतिनिधी – दिनांक २ जानेवारी २०२६ रोजी पहाटे २ वाजेच्या सुमारास पाचोरा तालुक्यातील खेडगाव नंदीचे येथील सुपुत्र आणि केंद्रीय राखीव पोलीस दलातील (CRPF) जवान अनिल हेमराज बोरसे (वय ४१) यांना सेवा बजावत असताना वीरमरण आले. पुणे येथील सीआरपीएफ कॅम्पमध्ये जनरल ड्युटीवर कार्यरत असताना ही दुर्दैवी घटना घडली. त्यांच्या निधनाची बातमी समजताच खेडगाव नंदीचेसह पाचोरा तालुक्यावर शोककळा पसरली.

शहीद जवान अनिल बोरसे यांचे पार्थिव आज त्यांच्या मूळ गावी खेडगाव नंदीचे येथे आणण्यात आले. गावात पोहोचताच शोकाकुल वातावरणात नागरिकांनी अश्रूंनी निरोप दिला. शासकीय इतमामात अंत्यसंस्कार करण्यात आले. यावेळी पाचोरा-भडगाव मतदारसंघाचे आमदार किशोर आप्पा पाटील, प्रशासकीय अधिकारी, पोलीस दलाचे अधिकारी, माजी सैनिक, सर्व पक्षांचे पदाधिकारी, सामाजिक कार्यकर्ते तसेच ग्रामस्थ मोठ्या संख्येने उपस्थित होते. जवानांच्या सलामीने शहीदाला अखेरचा निरोप देण्यात आला.

शहीद जवान अनिल बोरसे यांच्या कार्याविषयी…

जुलै २००४ मध्ये सैन्यदलात भरती झालेल्या अनिल बोरसे यांनी तब्बल २१ वर्षे अत्यंत निष्ठेने व शौर्याने देशसेवा केली. कर्तव्याप्रती असलेली त्यांची निष्ठा, शिस्त आणि समर्पण यामुळे सहकाऱ्यांमध्ये ते आदराने ओळखले जात होते. विविध ठिकाणी कठीण परिस्थितीत सेवा बजावत असतानाही त्यांनी कधीही कर्तव्यापासून पळ काढला नाही, अशी भावना सहकाऱ्यांनी व्यक्त केली.

शहीद अनिल बोरसे यांच्या पश्चात वृद्ध आई-वडील, एक भाऊ, वहिनी, पत्नी, दोन मुली आणि एक मुलगा असा मोठा परिवार आहे. त्यांच्या अकाली निधनाने कुटुंबाचा आधारवड हरपल्याची भावना नातेवाईक आणि ग्रामस्थांनी व्यक्त केली. शासनाने शहीद जवानांच्या कुटुंबाला सर्वतोपरी मदत करावी, अशी मागणी यावेळी करण्यात आली.

देशासाठी सर्वोच्च बलिदान देणाऱ्या शहीद अनिल बोरसे यांच्या स्मृतीस पाचोरा तालुक्यातील नागरिकांनी भावपूर्ण श्रद्धांजली अर्पण केली असून, त्यांच्या त्यागाचे ऋण कधीही विसरता येणार नाही, अशी भावना सर्वत्र व्यक्त होत आहे.

इतर महत्वाच्या बातम्या….

🚨 ब्रेकिंग : जळगावमध्ये माघार घेण्यासाठी उमेदवारांचे अपहरण अन् दबाव… संजय राऊत यांचा आरोप

🚨 ब्रेकिंग : एक निष्ठावंत शिवसैनिक ते नगरसेवक, संदीप राजे यांच्या राजकीय प्रवासावर विशेष लेख…

🚨 ब्रेकिंग : शिंदे सेनेचे नगरसेवक लखीचंद पाटील यांची भडगाव नगरपालिकेच्या गटनेतेपदी निवड….