🚨 ४८ तासांच्या शोध कार्यानंतर नीताचा मृतदेह आढळला तर धक्क्याने आजोबांचा मृत्यू, पाचोऱ्यात धक्कादायक घटना

हॅलो जनता न्यूज, पाचोरा – तालुक्यातील वडगाव टेक येथे १९ सप्टेंबर रोजी दुपारी हिवरा नदीत पाय घसरून वाहून गेलेली नीता संजय भालेराव (वय १४) हिचा मृतदेह अखेर ४८ तासांच्या शोधकार्यांनंतर परधाडे शिवारात सापडला. सलग दोन दिवस प्रशासन, पोहणारे युवक व स्थानिक ग्रामस्थांनी मोठ्या प्रमाणावर शोधमोहीम राबवली होती. अत्याधुनिक तंत्रज्ञानासह ड्रोन चा वापर करून अखेर मुलीचा शोध लागला.

१९ सप्टेंबर रोजी दुपारी साधारणपणे एकच्या सुमारास नीता हिवरा नदीकाठी गेली असता पाय घसरून ती नदीच्या प्रवाहात वाहून गेली. घटनेची माहिती मिळताच गावकरी आणि पोहणारे युवक घटनास्थळी दाखल झाले. तातडीने शोधमोहीम सुरू करण्यात आली. मात्र, अनेक तासांच्या प्रयत्नांनंतरही मृतदेह हाती लागला नव्हता.

प्रशासनातर्फे ४८ तासांची शोधमोहीम

घटनास्थळी प्रशासनाने दोन दिवस सलग प्रयत्न केले. स्थानिक युवक, पोहणारे तसेच विविध यंत्रणांनी समन्वय साधत शोधकार्य केले. अखेर २० सप्टेंबर रोजी सायंकाळी परधाडे शिवारात तिचा मृतदेह सापडला. यानंतर परिसरात हळहळ व्यक्त करण्यात आली.

या घटनेचा मोठा मानसिक धक्का नीताचे आजोबा श्यामराव विठ्ठल खरे (वय ७२) यांना बसला. नात नदीत वाहून गेल्याचे समजताच त्यांना हृदयविकाराचा झटका आला. घटनेनंतर काही वेळातच त्यांचे निधन झाले. रात्री उशिरा त्यांच्यावर अंत्यसंस्कार करण्यात आले.

आमदार किशोर पाटील यांची घटनास्थळी भेट…

घटनेनंतर आमदार किशोर पाटील व जिल्हा परिषदेचे माजी सदस्य पदमसिंग पाटील यांनी घटनास्थळाला भेट दिली. त्यांनी भालेराव कुटुंबीयांची सांत्वनपर भेट घेत धीर दिला. एकीकडे नात नदीत वाहून गेल्याचा तर दुसरीकडे आजोबांच्या निधनाचा दुहेरी आघात भालेराव कुटुंबीयांवर कोसळला आहे. या दुर्दैवी घटनेमुळे वडगाव टेक परिसरात शोककळा पसरली असून सर्वत्र हळहळ व्यक्त होत आहे.

इतर महत्वाच्या बातम्या…

🚨 जळगाव शहरात पोलिसांची ड्रग्स माफियांवर मोठी कारवाई

🏆 मोहनलाल यांना चित्रपट सृष्टीतील सर्वात मानाचा पुरस्कार जाहीर, देशभरातून शुभेच्छांचा वर्षाव…

🚨पाचोरा तालुक्यातील पूरग्रस्तांना आमदार किशोर पाटील यांच्या वतीने दिलासा….