🚨जळगावात खळबळ : बेपत्ता तरुणाचा जीभ कापलेला मृतदेह मेहरूण तलावात आढळला

हॅलो जनता न्यूज, जळगाव – शहरात धक्कादायक घटना उघडकीस आली आहे. दोन दिवसांपासून बेपत्ता असलेल्या एका २१ वर्षीय तरुणाचा मृतदेह आज मेहरुन तलावात आढळून आला. या घटनेने परिसरात एकच खळबळ उडाली आहे. विशेष म्हणजे मृतदेहाची अवस्था पाहून नातेवाईकांनी जीभ कापल्याचा संशय व्यक्त केला असून, हा घातपात असल्याचा अंदाज व्यक्त करण्यात येत आहे.

मृत तरुणाचे नाव शेख अबूजर शेख युनूस (वय २१, रा. तांबापुरा, बिलाल चौक, जळगाव) असे आहे. अबूजर दोन दिवसांपूर्वी घरातून बाहेर पडला होता. मात्र तो परत न आल्यानंतर कुटुंबीयांनी सर्वत्र शोध घेतला, परंतु तो सापडला नाही. दरम्यान, मेहरुन तलाव परिसरात मासेमारी करणाऱ्या एका मच्छिमाराला पाण्यात एक मृतदेह तरंगताना दिसला. त्याने तात्काळ पोलिसांना माहिती दिली.

पोलिसांनी घटनास्थळी धाव घेत मृतदेह बाहेर काढला. ओळख पटविण्यासाठी बोलावण्यात आलेल्या कुटुंबीयांनी तो अबूजर असल्याचे सांगितले. मृतदेहावर घरातून बाहेर पडताना घातलेले कपडे होते. तसेच त्याच्या खिशात मोबाईल फोनही सापडला. मात्र, मृतदेह पाहताच नातेवाईकांनी जीभ कापल्याचा संशय व्यक्त केला. यामुळे हा प्रकार आत्महत्या नसून थेट घातपात असल्याचे आरोप त्यांनी केले.

जळगाव पोलीस : घटनेनंतर परिसरात तणावपूर्ण वातावरण..

या घटनेमुळे परिसरात तणावपूर्ण वातावरण निर्माण झाले असून, कुटुंबीय व स्थानिक नागरिकांनी घटनेची सखोल चौकशी करून दोषींना अटक करण्याची मागणी केली आहे. दरम्यान, पोलिसांनी मृतदेह ताब्यात घेऊन शवविच्छेदनासाठी जिल्हा शासकीय रुग्णालयात पाठवला आहे. प्राथमिक चौकशीनंतर गुन्हा दाखल करण्यात आला असून, पुढील तपास सुरू असल्याची माहिती पोलिसांनी दिली आहे. अबूजरच्या अकाली आणि संशयास्पद मृत्यूमुळे तांबापुरा परिसरात हळहळ व्यक्त होत आहे. आत्महत्या की घातपात याबाबत अजूनही सस्पेन्स कायम असून, पोलीस तपासातूनच या प्रकरणाचे खरे चित्र स्पष्ट होणार आहे.

इतर महत्वाच्या बातम्या…

🚨 ४८ तासांच्या शोध कार्यानंतर नीताचा मृतदेह आढळला तर धक्क्याने आजोबांचा मृत्यू, पाचोऱ्यात धक्कादायक घटना

🚨 जळगाव शहरात पोलिसांची ड्रग्स माफियांवर मोठी कारवाई

🌾 ब्रेकिंग : ज्वारी उत्पादक शेतकऱ्यांना मोठा दिलासा, ३० सप्टेंबरपर्यंत ज्वारी खरेदीस मुदतवाढ