🛑 सोलापूरच्या सुपुत्राचा भारतात डंका – UPSC IES परीक्षेत आठवा क्रमांक

हॅलो जनता न्यूज, सोलापूर | दि. ४ ऑक्टोबर – सोलापूरच्या सुपुत्राने पुन्हा एकदा महाराष्ट्राचे नाव उज्ज्वल केले आहे. केंद्रीय लोकसेवा आयोगाच्या (UPSC) इंडियन इकॉनॉमिक सर्व्हिसेस (IES) या प्रतिष्ठित परीक्षेत मयुरेश भारत वाघमारे यांनी देशात आठवा क्रमांक मिळवत राज्याचे नाव अभिमानाने उंचावले आहे. विशेष म्हणजे, एकूण १२ जागांसाठी देशभरातील तब्बल ४ लाख ३० हजार विद्यार्थी परीक्षेला बसले होते. या प्रचंड स्पर्धेत मयुरेश यांनी केवळ यशच मिळवले नाही, तर महाराष्ट्रातून एकमेव प्रतिनिधी म्हणून स्थान मिळवले आहे.

सोलापूरसह संपूर्ण महाराष्ट्रात आनंदाचे वातावरण

मयुरेश यांच्या या यशामुळे सोलापूरसह राज्यभरात आनंदाचे वातावरण आहे. “कष्ट, चिकाटी आणि योग्य मार्गदर्शन असेल तर यश नक्की मिळते,” हे त्यांनी आपल्या कामगिरीतून सिद्ध केले आहे. मूळचे सोलापूरचे मयुरेश हे सध्या रायगड जिल्ह्यात अलिबाग येथे कार्यरत असलेल्या अपर जिल्हाधिकारी भारत वाघमारे यांचे चिरंजीव आहेत. त्यांच्या घरात प्रशासकीय परंपरेचा वारसा असून, आजोबा अंगद वाघमारे उपजिल्हाधिकारी होते. त्यामुळे शिस्त, मेहनत आणि प्रामाणिकपणा यांचे संस्कार त्यांना लहानपणापासूनच लाभले.

शैक्षणिक पार्श्वभूमी

• प्राथमिक शिक्षण – सुयश विद्यालय, सोलापूर
• बारावी शिक्षण – संगमेश्वर कॉलेज, सोलापूर
• उच्च शिक्षण – इंग्लंडमध्ये ॲग्रीकल्चर ॲडव्हान्स्ड
• इकॉनॉमिक्स – विषयात पदवी व पदव्युत्तर शिक्षण

जागतिक दर्जाचे शिक्षण घेत असतानाच त्यांनी भारतात परतल्यावर प्रशासकीय सेवेत प्रवेश करण्याचा निश्चय केला. जून २०२५ – लेखी परीक्षा पार पडली, ९ सप्टेंबर २०२५ – निकाल जाहीर, १६ सप्टेंबर २०२५ – वैद्यकीय परीक्षा पार पडली. अंतिम निकालात मयुरेश भारत वाघमारे देशात आठवा क्रमांक पटकावला.

UPSC च्या IES परीक्षा आयएएस श्रेणीतील महत्त्वाची परीक्षा मानली जाते. या यशानंतर मयुरेश यांची नियुक्ती केंद्रीय वित्त मंत्रालय, रिझर्व्ह बँक ऑफ इंडिया किंवा इतर महत्त्वाच्या केंद्रीय संस्थांमध्ये होण्याची शक्यता आहे. महाराष्ट्राच्या युवकांसाठी प्रेरणादायी ठरलेले हे यश सोलापूरच्या भूमीतून राष्ट्रीय स्तरावर मिळालेले आणखी एक अभिमानाचे पर्व ठरले आहे.

इतर महत्वाच्या बातम्या…

🚨 ब्रेकिंग : रावेर तालुक्यात १०८ उपद्रवी हद्दपार, पोलिसांचे प्रतिबंधात्मक पाऊल

💐 पाचोऱ्यात जल्लोष – २०२५ उत्सवात उर्मिला गोसावी ठरल्या ‘दांडिया क्वीन २०२५’

🚨 ब्रेकिंग : प्रांजल खेवलकर प्रकरणात खडसेंचे पोलिसांवर गंभीर आरोप, म्हणाले…