🛑 ब्रेकिंग : जळगावात मनसे आक्रमक, दहा दिवसांत तोडगा अन्यथा…

हॅलो जनता न्यूज, जळगाव : शहरातील औद्योगिक प्रशिक्षण संस्था (आयटीआय) समोर उभारण्यात आलेल्या कचरा संकलन केंद्रामुळे परिसरात असह्य दुर्गंधी पसरून विद्यार्थ्यांचे व नागरिकांचे आरोग्य धोक्यात आले आहे. या पार्श्वभूमीवर महाराष्ट्र नवनिर्माण सेनेच्या (मनसे) वतीने आज विद्यार्थ्यांना घेऊन तीव्र आंदोलन छेडण्यात आले. विद्यार्थ्यांसह परिसरातील नागरिकांनीही मोठ्या संख्येने सहभागी होत मनपाच्या निष्काळजीपणाचा तीव्र शब्दांत निषेध नोंदविला.

मनसे आक्रमक : दुर्गंधीमुळे आरोग्य धोक्यात

मनसे पदाधिकाऱ्यांनी आयुक्तांना दिलेल्या निवेदनात नमूद केले की, “कचरा केंद्रामुळे परिसरात प्रचंड दुर्गंधी पसरली आहे. उघड्यावर कचरा साठवला जात असल्याने माशा, डास, उंदीर यांचा उपद्रव दिवसेंदिवस वाढत आहे. यामुळे विद्यार्थ्यांचे व नागरिकांचे आरोग्य गंभीर धोक्यात आले असून, सार्वजनिक आरोग्य अधिनियम व पर्यावरण संरक्षण अधिनियमाचे सरळ उल्लंघन होत आहे.” शासकीय तंत्रनिकेतनसारख्या नामांकित संस्थेच्या शेजारी कचरा केंद्र उभारणे ही विद्यार्थ्यांच्या मूलभूत अधिकारांवर गदा आणणारी बाब असल्याचा आरोप मनसेने केला.

मनसे आक्रमक : नागरिकांचा रोष

स्थानिक नागरिकांनीही आंदोलनाला पाठिंबा दर्शविताना सांगितले की, यापूर्वी अनेक वेळा तक्रारी करूनही कोणतीही ठोस कारवाई झाली नाही. “मुलांचे शिक्षण व आरोग्य धोक्यात घालणारी ही परिस्थिती सहन केली जाणार नाही. जर तातडीने तोडगा काढला गेला नाही, तर आम्हाला उग्र पावले उचलावी लागतील,” असा इशारा नागरिकांनी दिला.

मनसेचा महापालिकेला इशारा..

मनसे पदाधिकाऱ्यांनी स्पष्ट केले की, “कचरा संकलन केंद्र कायमस्वरूपी बंद करण्यात आले नाही, तर कायदेशीर मार्गाने उग्र आंदोलन करण्यात येईल. त्याची सर्वस्वी जबाबदारी महापालिकेवर राहील.” स्वच्छ भारत अभियान चालवणारीच संस्था शहराच्या मुख्य रस्त्यावर कचऱ्याचा ढीग लावते, ही जळगावकरांसाठी लज्जास्पद बाब असल्याचेही आंदोलनादरम्यान व्यक्त करण्यात आले.

या आंदोलनात महाराष्ट्र नवनिर्माण सेनेचे जिल्हाध्यक्ष ॲड. जमील देशपांडे, महानगराध्यक्ष किरण तळेले, विनोद शिंदे, उपमहानगराध्यक्ष श्रीकृष्ण मेंगडे, ललित शर्मा, रज्जाक सय्यद, प्रकाश जोशी, शेतकरी सेना जिल्हाध्यक्ष अविनाश पाटील, दीपक राठोड, प्रदीप पाटील, भूषण ठाकूर, राहुल चव्हाण, विशाल जाधव, महिला सेनेच्या अनिता कापुरे, लक्षी मोरे आदी पदाधिकारी उपस्थित होते. तसेच शासकीय आयटीआयचे सर्व शिक्षकवर्ग व सुमारे दोनशे विद्यार्थी मोठ्या संख्येने उपस्थित राहिले.

मनसे आक्रमक : महापालिकेचे आश्वासन

दरम्यान, महानगरपालिका आरोग्य अधिकारी उदय पाटील यांनी प्रत्यक्ष ठिकाणी भेट देऊन आंदोलनकर्त्यांशी संवाद साधला. त्यांनी दहा दिवसांच्या आत या समस्येवर ठोस तोडगा काढण्यात येईल, असे आश्वासन दिले. या आश्वासनानंतर मनसेने आंदोलन दहा दिवसांसाठी स्थगित करण्याचा निर्णय घेतला. आता पुढील दहा दिवसांत महापालिका खरंच ठोस पावले उचलते का, की मनसे पुन्हा एकदा रस्त्यावर उतरते, याकडे जळगावकरांचे लक्ष लागले आहे.

इतर महत्वाच्या बातम्या…

🛑 ब्रेकिंग : जळगावात शेतकरी आक्रमक; गेट तोडून जिल्हाधिकारी कार्यालयात प्रवेश…

🛑 बिग ब्रेकिंग : लवकरच स्थानिक स्वराज्य संस्थांच्या निवडणुकांचे वेळापत्रक जाहीर होणार, निवडणुका तीन टप्प्यांत?

मंत्री गिरीश महाजन यांनी नुकसानग्रस्त भागाची केली पाहणी, शेतकऱ्यांना म्हणाले…