🚨 पाचोरा तालुक्यात पुन्हा मुसळधार पाऊस सुरू, नागरिकांना सतर्कतेचा इशारा

desk3 weeks ago

0 518 1 minute read

हॅलो जनता न्यूज, पाचोरा/भडगाव : पाचोरा व भडगाव तालुक्यात आज पुन्हा रात्रीच्या दहाच्या सुमारास मुसळधार पावसाला सुरुवात झाली असून, नागरिक व शेतकऱ्यांमध्ये चिंतेचे वातावरण निर्माण झाले आहे. काल रात्री झालेल्या ढगफुटी सदृश पावसामुळे तालुक्यातील अनेक भागात मोठ्या प्रमाणावर शेती, घरे व जनावरांचे नुकसान झाले होते. त्यात भर म्हणून आज पुन्हा सुरू झालेल्या पावसाने हाहाकार उडाला आहे.

कालच्या पावसाने पाचोरा शहरासह ग्रामीण भागातील अनेक गावांमध्ये पाणी साचून रस्ते वाहून गेले, घरांची पडझड झाली, तर पिकांचे प्रचंड नुकसान झाले. नागरिकांना अजूनही कालच्या नुकसानीतून सावरण्याची संधी मिळाली नाही, तोच आज पुन्हा पावसाने जोर धरला आहे. यामुळे परिस्थिती अधिक भीषण होण्याची शक्यता प्रशासनाने वर्तवली असून नागरिकांना सतर्कतेचा इशारा देण्यात आला आहे.

गाळण, खडकदेवळा, नगरदेवळा, भोजे, तारखेडा यासह परिसरात धरणक्षेत्रात सध्या जोरदार पाऊस सुरू आहे. धरण परिसरातील वाढत्या पाण्यामुळे खालच्या गावांमध्ये धोका निर्माण होऊ शकतो, अशी भीती व्यक्त होत आहे. दरम्यान, प्रशासनाने सतत पावसाच्या घडामोडींवर लक्ष ठेवले असून, आवश्यक ती खबरदारी घेण्याचे आवाहन करण्यात आले आहे.

शेतकऱ्यांचे पिके आधीच पाण्याखाली गेल्याने आणि जनावरांसाठी चारा संकट निर्माण झाल्याने मोठे आर्थिक नुकसान झाले आहे. नागरिक व शेतकरी यांना मदत मिळावी, यासाठी स्थानिक लोकप्रतिनिधींनी शासनाकडे मागणी केली आहे. दरम्यान, पावसामुळे नद्या, नाले तुडुंब भरून वाहत असल्याने पुलांवरून पाणी वाहत असल्याची माहिती मिळत आहे. प्रशासनाने नागरिकांना पूरग्रस्त भागात जाणे टाळावे, तसेच सुरक्षित ठिकाणी राहण्याचे आवाहन केले आहे.

पावसाचा जोर कायम राहिल्यास पाचोरा व भडगाव परिसरात आणखी गंभीर परिस्थिती निर्माण होऊ शकते, अशी भीती व्यक्त होत आहे.

इतर महत्वाच्या बातम्या…

🛑पाचोरा : नुकत्याच लोकार्पण झालेल्या उपविभागीय पोलिस अधिकारी कार्यालय पाण्यात, कामाच्या दर्जावर प्रश्नचिन्ह..

🚨 ब्रेकिंग : पाचोरा ढगफुटी, शेत पाहायला गेलेल्या शेतकऱ्याचा नाल्यात वाहून मृत्यू

🛑 पाचोरा तालुक्याला पुन्हा अतिवृष्टीचा तडाखा, गावांमध्ये पाणी शिरल्याने संपर्क तुटला.