🚨 जळगाव ब्रेकिंग : मुख्यमंत्र्यांची मध्यस्थी, अखेर महापालिकेतील “त्या” ७ नगरसेवकांचा प्रवेश निश्चित..

desk4 hours ago

0 175 1 minute read

🚨 जळगाव ब्रेकिंग : मुख्यमंत्र्यांची मध्यस्थी, अखेर महापालिकेतील "त्या" नगरसेवकांचा प्रवेश निश्चित..

हॅलो जनता न्यूज, जळगाव | महानगरपालिकेच्या आगामी निवडणुकांच्या पार्श्वभूमीवर भाजपमध्ये मोठी राजकीय हालचाल सुरू झाली आहे. ठाकरे गटाशी संबंधित आठ माजी नगरसेवकांच्या भारतीय जनता पक्ष प्रवेशाचा मार्ग अखेर मोकळा झाला असून, या प्रवेशासाठी गुरुवार, दि. ३० ऑक्टोबरचा मुहूर्त निश्चित करण्यात आला आहे. या प्रवेश सोहळ्यास राज्याचे जलसंपदा मंत्री गिरीश महाजन उपस्थित राहणार आहेत.

महापालिकेच्या आगामी निवडणुकांचे पडघम वाजू लागले आहेत. गेल्या निवडणुकीत भाजपचे ५७ नगरसेवक निवडून आले होते, मात्र अडीच वर्षांत तब्बल २७ नगरसेवक फुटल्याने भाजपला सत्ता सोडावी लागली आणि विरोधी बाकांवर बसावे लागले. त्यामुळे यावेळी भाजप कोणत्याही परिस्थितीत बहुमत मिळवून पाच वर्षे सत्ता टिकविण्याच्या रणनीतीवर काम करत आहे.

जळगाव महापालिका : विरोधकांना ‘कमळ’खाली आणण्यासाठी मोहीम

सत्तेची कमान पुन्हा आपल्या हाती ठेवण्यासाठी भाजपकडून विरोधकांतील काही प्रभावी माजी नगरसेवकांना पक्षात सामावून घेण्याचे प्रयत्न सुरू होते. या पार्श्वभूमीवर ठाकरे गटाशी संबंधित काही माजी नगरसेवकांनी भाजप प्रवेशाची तयारी दर्शविली होती. मात्र, पक्षातील स्थानिक इच्छुक कार्यकर्त्यांनी त्यांच्या प्रवेशाला तीव्र विरोध दर्शविला.

जळगाव महापालिका : फडणवीसांपर्यंत पोहोचला मुद्दा

प्रवेशाला झालेल्या या विरोधामुळे प्रश्न थेट उपमुख्यमंत्री देवेंद्र फडणवीस यांच्यापर्यंत गेला. इच्छुकांचे म्हणणे योग्य असल्याचे मान्य करत प्रवेश प्रक्रिया काही काळासाठी स्थगित करण्यात आली होती. मात्र, पक्षातील समन्वयानंतर पुन्हा चर्चेचे दरवाजे उघडले गेले. या संपूर्ण प्रकरणात जलसंपदा मंत्री गिरीश महाजन यांनी मध्यस्थीची भूमिका बजावली. त्यांनी पक्षातील इच्छुकांची समजूत काढत सांगितले की, “पक्ष बळकट करण्यासाठी व विरोधकांना पराभूत करण्यासाठी काहीवेळा अशा राजकीय निर्णयांची आवश्यकता असते.” त्यांच्या प्रयत्नांनंतर पक्षातील अनेकांनी प्रवेशास हरकत न घेण्याची तयारी दर्शविली. विरोधातील माजी नगरसेवकांच्या प्रवेशासाठी अंतिम चर्चेत काही अटी घालण्यात आल्या. सर्व माजी नगरसेवकांना प्रवेश न देता फक्त काही निवडकांना पक्षात घेण्याचा निर्णय घेण्यात आला. प्रवेशकत्यांनीही ही अट मान्य केली असून, अखेरीस आठ माजी नगरसेवकांचा समावेश निश्चित करण्यात आल्याचे सूत्रांनी सांगितले.

या प्रवेश सोहळ्यासाठी गुरुवार, दि. ३० ऑक्टोबरचा मुहूर्त ठरविण्यात आला आहे. जळगाव येथे पक्ष कार्यालयात हा कार्यक्रम होणार असून, जलसंपदा मंत्री गिरीश महाजन यांच्या उपस्थितीत प्रवेश प्रक्रिया पार पडेल.यामुळे शहरातील राजकीय वर्तुळात चर्चांना चांगलाच ऊत आला असून, “हा मुहूर्त साधला जाणार का?” याकडे आता सर्वांचे लक्ष लागले आहे.

इतर महत्वाच्या बातम्या…

🚨 पाचोरा ब्रेकिंग : पक्षनिष्ठांपेक्षा स्वच्छ प्रतिमेच्या उमेदवारांनाच प्राधान्य द्यावे, जनतेची सर्व पक्षांकडून अपेक्षा

🔴 ब्रेकिंग : गिरणा धरण, सतर्कतेचा इशारा : पाण्याचा विसर्ग वाढविला…

💥 ब्रेकिंग :जळगाव-पाचोरा रस्त्यावर ट्रॅव्हल्स आणि कारचा भीषण अपघात, प्रवासी जखमी तर…