💥 ब्रेकिंग : यावल येथील प्रभारी पशुवैद्यकीय अधिकाऱ्याचा संशयास्पद मृत्यू, कुजलेला मृतदेह घरात आढळल्याने खळबळ

हॅलो जनता न्यूज, यावल : शहरातील फैजपूर रोडवरील पांडुरंग सराफ नगर येथे राहणारे प्रभारी पशुवैद्यकीय अधिकारी रतनलाल छोटूराम भगुरे (वय ४८, मूळ रा. सेलू, जि. परभणी) यांचा कुजलेला मृतदेह गुरुवारी (दि. २५) त्यांच्या राहत्या घरात आढळून आला. गेल्या काही दिवसांपासून ते घराबाहेर दिसून न आल्याने व घरातून दुर्गंधी येऊ लागल्याने हा प्रकार उघड झाला. या घटनेमुळे परिसरात मोठी खळबळ उडाली आहे.

यावल घटना: परिसरात दुर्गंधी पसरल्याने समोर आला प्रकार

मिळालेल्या माहितीनुसार, पांडुरंग सराफ नगरातील आत्माराम पाटील यांच्या घरात रतनलाल भगुरे हे भाड्याने राहात होते. ते एकटेच राहत असल्याने त्यांच्या हालचालींचा फारसा मागोवा लागत नव्हता. मात्र, गुरुवारी घरातून दुर्गंधी पसरू लागल्याने परिसरातील लुकमान पटेल यांनी पोलिसांना माहिती दिली.

घटनेची माहिती मिळताच पोलिस निरीक्षक रंगनाथ धारबळे, सहायक फौजदार विजय पाचपोळे, पोलीस कर्मचारी वसीम तडवी व राजेंद्र पवार घटनास्थळी दाखल झाले. त्यांनी घरात डोकावून पाहिले असता भगुरे यांचा कुजलेला मृतदेह आढळला. तत्काळ फॉरेन्सिक पथकाला पाचारण करण्यात आले. ग्रामीण रुग्णालयाचे वैद्यकीय अधिकारी डॉ. तुषार सोनवणे, अमोल अडकमोल व भूषण गाजरे यांच्या मदतीने मृतदेह ताब्यात घेऊन ग्रामीण रुग्णालयात पाठविण्यात आला.

या घटनेची माहिती पोलिसांनी त्यांच्या भावाला दिली. त्यानंतर रात्री उशिरा यावल येथेच त्यांचा अंत्यसंस्कार करण्यात आला. आत्माराम पाटील यांच्या खबरीवरून पोलिसांनी अकस्मात मृत्यूची नोंद केली असून पुढील तपास पोलीस नाईक राजेंद्र पवार करीत आहेत. दरम्यान, स्थानिक नागरिकांच्या माहितीनुसार, डॉ. भगुरे शनिवारी घरात दिसले होते. त्यानंतर त्यांचा कोणाशीही संपर्क झाला नव्हता. त्यामुळे त्यांचा मृत्यू शनिवारी रात्रीच झाल्याचा प्राथमिक अंदाज व्यक्त केला जात आहे.

इतर महत्वाच्या बातम्या…

💥 ब्रेकिंग : चांदीने गाठले सर्वात उच्चांकी दर, इतक्या हजारांनी वाढ…

💥 ब्रेकिंग : “मुख्यमंत्री लाडकी बहीण” योजना, e-KYC सुविधा सुरू, इतके दिवस मुदत…

💥 जळगाव ब्रेकिंग : भाजप कार्यकर्त्याच्या घरावर ईडीचा छापा, १३ तासांपेक्षा अधिक काळ तपासणी..

या घटनेमुळे यावल शहरात हळहळ व्यक्त होत असून प्रभारी पशुवैद्यकीय अधिकाऱ्याच्या संशयास्पद व्यक्तीमुळे अनेक चर्चांना उधाण आले आहे. मात्र मृत्यूचे नेमके कारण शवविच्छेदन अहवालानंतरच स्पष्ट होणार असल्याचे पोलिसांनी सांगितले आहेत.