💥गाळण गावात पाटील कुटुंबाचा स्तुत्य उपक्रम, उत्तरकार्याच्या खर्चातून शालेय साहित्य वाटप

हॅलो जनता न्यूज, पाचोरा :- तालुक्यातील गाळण बुद्रुक येथील पाटील कुटुंबीयांनी आईच्या निधनानंतर उत्तरकार्य, पित्तर भोजन यासारखे विधी न करता, आईच्या अस्थी शेतात टाकून त्या ठिकाणी वृक्षारोपण केले. या रोपांचे आईप्रमाणे संवर्धन व संगोपन करण्याचा एकमुखी निर्धार केला आहे. याशिवाय उत्तरकार्य विधीवर होणाऱ्या खर्चातून गावातील जिल्हा परिषदेच्या शाळेतील विद्यार्थ्यांना उपयुक्त शैक्षणिक साहित्याचे वाटप करण्यात आले. या स्तुत्य उपक्रमामुळे पाटील परिवाराने वेगळा आदर्श निर्माण केला असून त्यांच्या या उपक्रमाचे सर्वत्र कौतुक केले जात आहे.

गाळण बुद्रुक येथील पाटील कुटुंबातील ज्येष्ठ सदस्या शांताबाई पांडुरंग पाटील (वय ८७) यांचे नुकतेच निधन झाले. त्यांच्यावर गावातच अत्यंत साध्या पद्धतीने अंत्यसंस्कार करण्यात आले. दुसऱ्या दिवशी अस्थी गोळा केल्यानंतर त्या शेतात व बांधावर टाकण्यात आल्या. त्याच ठिकाणी घरातील सर्व सदस्यांच्या हस्ते वृक्षारोपण करून त्या वृक्षांची आई प्रमाणेच काळजी घेऊन वृक्ष संवर्धनाचा संकल्प केला.

बारा, तेरा दिवस दुखवटा पाळून आपल्या दैनंदिन कामकाजाकडे दुर्लक्ष करण्यापेक्षा पाचव्या दिवशी दशक्रिया, गंधमुक्ती व उत्तरकार्याचा कार्यक्रम केला. यात प्रतिमा पूजन, पुष्पांजली अर्पण व अभिवादन केले.

गाळण : उत्तर कार्यासाठी लागणाऱ्या खर्चातून शैक्षणिक साहित्याचे वाटप..

उत्तरकार्यासाठी लागणाऱ्या सुमारे २५ हजारांच्या खर्चातून उपयुक्त शैक्षणिक साहित्य घेऊन ते गावातीलच जिल्हा परिषद शाळेतील विद्यार्थ्यांना वाटप केले. (कै.) शांताबाई पाटील यांच्या अर्जुन व राजेंद्र या दोन्ही मुले पुरोगामी विचारांची आहेत. त्यांच्यावर छत्रपती शिवाजी महाराज व श्री संत तुकाराम महाराजांचा पगडा आहे. मोठे बंधू अर्जुन पाटील हे शेती पाहतात तर शिवश्री राजेंद्र पाटील हे पाचोरा बस आगारात मुख्य मेकॅनिक आहेत. ते शिव विवाहांसोबतच वास्तुशांती, उत्तरकार्य कार्यक्रमांसाठी राज्यभर फिरून शिवकालीन कार्यपद्धतीचा प्रचार व प्रसार करीत असतात.

माँ साहेब जिजाऊ, छत्रपती शिवाजी महाराज, श्री संत तुकाराम यांची पुस्तके ते वाटप करून विविध विधी पार पाडतात. त्यांनीच आईच्या अंत्यविधीसह दशक्रिया विधी व उत्तरकार्याप्रसंगी पुरोहितास न बोलवता स्वतः शिवविधी पार पडला. आईच्या अस्थी शेतात टाकून त्यावर वृक्षारोपण केल्यामुळे या वृक्षांमध्ये आईचे रूप अनुभवण्याची पाटील परिवाराची मनोवृत्ती कौतुकास्पद ठरली असून त्यांनी वेगळा पायंडा पाळला आहे.

इतर महत्वाच्या बातम्या….

💥 जळगाव ब्रेकिंग : स्थानिक स्वराज्य संस्था निवडणूक, निवडणूक आयोगाकडून मतदान यंत्र प्राप्त

💥 ब्रेकिंग : वाढदिवस साजरा करून घरी जात असताना भीषण अपघात, सात जणांचा मृत्यू तर..

💥 ब्रेकिंग :शेतकऱ्यांना विकासोमार्फतच कर्ज वाटप करण्याचे निर्देश, आमदार किशोर पाटील यांच्या पाठपुराव्याला यश