हॅलो जनता प्रतिनिधी : जगदीश अमृतकर कजगांव
कजगांव : येथील गणेशोत्सवाची सांगता गणपती विसर्जन मिरवणुकीने भक्तिमय आणि उत्साहपूर्ण वातावरणात झाली. ‘गणपती बाप्पा मोरया, पुढच्या वर्षी लवकर या!’च्या जयघोषात भाविकांनी गणरायाला निरोप दिला.
गणरायाच्या विसर्जनासाठी कजगावातील नागरिक मोठ्या संख्येने सहभागी झाले होते. महिला, युवक, बालकांसह ग्रामस्थांनी मिरवणुकीत उत्स्फूर्त सहभाग नोंदविला. आकर्षक पद्धतीने सजविलेल्या वाहनातून गणरायाची मिरवणूक काढण्यात आली. पारंपरिक वाद्यांच्या गजरात, ढोल-ताशांच्या निनादात आणि गणरायाच्या जयघोषाने संपूर्ण परिसर भक्तिमय झाला होता.
मिरवणुकीदरम्यान नागरिकांनी उत्साहासोबतच शिस्त व शांतता राखली. गणेशभक्तांनी भक्तिभावाने गणरायाचे दर्शन घेत मिरवणुकीत सहभाग नोंदविला. उत्सव काळात सामाजिक सलोखा आणि बंधुभावाचे दर्शन घडले.
कोणताही अनुचित प्रकार न घडता गणपती विसर्जन सोहळा शांततेत आणि उत्साहात पार पडला. अखेर ‘गणपती बाप्पा मोरया, पुढच्या वर्षी लवकर या!’च्या जयघोषात गणरायाला निरोप देण्यात आला.
