🛑 सातगाव डोंगरी परिसरात इतके नुकसान, महसूल प्रशासनाचे युद्ध पातळीवर पंचनामे सुरू…

हॅलो जनता न्यूज, पाचोरा – तालुक्यातील सातगाव डोंगरी परिसरात सोमवारी सकाळी झालेल्या ढगफुटी सदृश्य पावसामुळे बामणी व दगडी नद्यांना अचानक पूर आला. या पुरामुळे परिसरातील गावातील अनेक भागात पाणी शिरून जनजीवन विस्कळीत झाले असून नागरिकांना प्रचंड हालअपेष्टा सहन कराव्या लागत आहेत. या पुरात तब्बल १५० ते २०० घरांचे, संसारोपयोगी वस्तूंचे नुकसान झाल्याची प्राथमिक माहिती समोर आली आहे.

सातगाव नुकसान : पिके व जनावरांचे नुकसान

पूराच्या पाण्याने शेतकऱ्यांची उभी पिके तसेच जनावरांचे मोठ्या प्रमाणावर नुकसान केले आहे. प्राथमिक अहवालानुसार अनेक शेतकऱ्यांच्या शेतातील सोयाबीन, मका, बाजरी, भाजीपाला यासह विविध हंगामी पिकांचे नुकसान झाले असून शेतकऱ्यांवर मोठे संकट कोसळले आहे.

महसूल प्रशासनाकडून युद्ध पातळीवर पंचनामे सुरू…

घटनास्थळी तहसीलदार विजय बनसोडे यांच्यासह तालुक्यातील सर्व तलाठी, मंडळ अधिकारी, तालुका कृषी अधिकारी यांनी नुकसानीचा पंचनामा करण्यास सुरुवात केली आहे. महसूल प्रशासनाची संपूर्ण टीम आजच झालेल्या नुकसानीचे तातडीने पंचनामा करत असून, लवकरात लवकर मदत कार्य सुरू करण्यासाठी प्रयत्नशील आहे.

प्राथमिक अंदाजानुसार गावातील तब्बल १५० ते २०० घरांचे मोठे नुकसान झाले आहे. अनेक कुटुंबांचे संसार उद्ध्वस्त झाले असून काही कुटुंबांना सुरक्षित स्थळी हलविण्यात आले आहे. तसेच नाल्याच्या काठावर असलेल्या शेतीचे मोठ्या प्रमाणावर नुकसान झाल्याचे समोर आले आहे.

पूरग्रस्तांना तातडीने मदत मिळावी यासाठी प्रशासनाने यंत्रणा कार्यरत केली आहे. गावात अन्नधान्य, पिण्याचे पाणी, निवाऱ्याची सोय याकडे विशेष लक्ष दिले जात आहे. शेतकरी व गावकऱ्यांना दिलासा देण्यासाठी शासनस्तरावर मदतीचा प्रस्ताव देखील पाठवण्यात येणार असल्याची माहिती मिळाली आहे. सातगाव डोंगरी परिसरातील नागरिकांना प्रशासनाकडून मदतीची अपेक्षा असून लवकरच शासनाकडून दिलासा मिळेल, अशी आशा स्थानिकांनी व्यक्त केली आहे.

इतर महत्वाच्या बातम्या….

🛑 आमदार किशोर पाटलांचा मंत्री गिरीश महाजनांना फोन, तत्काळ पंचनामे करून नुकसान भरपाईचे आदेश…

🛑 पाचोरा तालुक्यात ढगफुटी सदृश्य पाऊस; संपूर्ण गावच वाहिले, शेकडो कुटुंबे उघड्यावर…

विद्यापीठाच्या विविध प्रशाळेतील ३८ विद्यार्थी सेट परीक्षेत उत्तीर्ण…