🛑 बनावट आदेश अन् तहसील कार्यालयात लाखोंची फसवणूक, सहाय्यक महसूल अधिकाऱ्यावर गुन्हा दाखल

हॅलो जनता न्यूज, जामनेर : जामनेर तहसील कार्यालयात तब्बल ₹२१.६३ लाखांची शासकीय फसवणूक झाल्याचा प्रकार उघडकीस आला आहे. सहाय्यक महसूल अधिकारी हर्षल विश्वनाथ पाटील (रा. भुसावळ) यांनी बनावट शासकीय आदेश तयार करून ही फसवणूक केल्याचा आरोप असून, तहसीलदार नानासाहेब आगळे यांनी स्वतः पोलिसांत फिर्याद दाखल केली आहे.

जामनेर तहसील : नेमके प्रकरण काय?

१२ सप्टेंबर रोजी गट क्रमांक ८३६/२ च्या ७/१२ उताऱ्याची तपासणी करताना धारणा प्रकार वर्ग २ वरून वर्ग १ मध्ये बदल झाल्याचे आढळले. यासाठी जोडलेल्या फेरफार नोंद क्रमांक ४२२५६ मधील आदेश संशयास्पद असल्याने चौकशी सुरू करण्यात आली. आदेशावर ई-ऑफिस प्रणालीचा संदर्भक्रमांक नसल्याने त्याची सत्यता संशयास्पद ठरली.

जामनेर तहसील : फोटोशॉपद्वारे बनावट आदेश केला तयार

तपासादरम्यान स्पष्ट झाले की, मूळ अर्ज तहसीलदारांनी २५ जुलै रोजी नजराणा न भरल्याने निकाली काढला होता. मात्र आरोपी पाटील यांनी याच पत्रावरील तहसीलदारांच्या सहीचा गैरवापर करून फोटोशॉपद्वारे बनावट आदेश तयार केला. खोट्या आदेशात जमिनीचे बाजारमूल्य ₹४३,२६,५७० दाखवून शासनाकडे ₹२१,६३,२८५ नजराणा जमा झाल्याचा खोटा दाखला तयार करण्यात आला. यासाठी MH016895725202526E हा बनावट चलन क्रमांक वापरण्यात आला. मात्र शासनाच्या GRAS प्रणालीवर या रकमेची कोणतीही नोंद आढळली नाही.

तहसिलदारांची जलद कारवाई अन् आरोपीची कबुली..

चौकशीदरम्यान आरोपीने आर्थिक मोहापोटी आदेश बनावट तयार केल्याची कबुली दिली. इतकेच नव्हे तर व्हॉट्सअॅपवर तहसीलदारांना चुकीची कबुली देत शासनाची रक्कम भरण्याची तयारीही दर्शवली.

या प्रकरणी जामनेर पोलिसांनी C.R. क्रमांक 313/2025 नोंदवून आरोपीविरुद्ध भारतीय न्याय संहिता 2023 चे कलम 316, 318, 336(2), 336(3), 337, 338, 339, 340(2), 341(1) अंतर्गत गुन्हा दाखल केला आहे. तपास सपोनि स्वप्निल शिंदे यांच्या मार्गदर्शनाखाली सुरू आहे.

तहसीलदार आगळे यांनी महसूल विभागातील अप्रामाणिक कृत्यांना आळा घालण्यासाठी जलद कारवाई केल्याने शेतकरी व नागरिकांनी समाधान व्यक्त केले. “शासनाची फसवणूक करणाऱ्यांवर कारवाईसाठी तहसीलदार साहेबांचं पाऊल धाडसी व स्वागतार्ह आहे,”* अशा प्रतिक्रिया उमटल्या. या घटनेनंतर तालुक्यातील वर्ग २ धारणा जमिनींची सर्वंकष फेरतपासणी करण्याची मागणी नागरिकांनी पुढे केली आहे.

इतर महत्वाच्या बातम्या…

🛑 जळगाव जिल्हा कृषि औद्योगिक सहकारी संस्थेची सर्वसाधारण सभा उत्साहात संपन्न, चेअरमन रोहित निकम यांच्या कामाचे कौतुक

केसीई सोसायटीची ८१ वर्षांची शैक्षणिक परंपरा, गौरव सोहळ्याचे भव्य आयोजन…

🛑 ब्रेकिंग : नेपाळमध्ये भारतीय भाविकांच्या बसवर हल्ला; आठ जण जखमी