🚨 पाचोरा ब्रेकिंग : पक्षनिष्ठांपेक्षा स्वच्छ प्रतिमेच्या उमेदवारांनाच प्राधान्य द्यावे, जनतेची सर्व पक्षांकडून अपेक्षा

हॅलो जनता न्यूज, पाचोरा : आगामी नगरपरिषदेच्या निवडणुकांच्या पार्श्वभूमीवर पाचोरा शहरात राजकीय वातावरण तापू लागले आहे. सर्वच पक्षांनी तयारीचा बिगुल वाजवला असून कार्यकर्ते, पदाधिकारी आणि इच्छुक नेत्यांची धावपळ वाढली आहे. प्रत्येक पक्षाकडून उमेदवारीसाठी शर्यत सुरू झाली असून अनेक इच्छुक नेते थेट वरच्या नेत्यांची भेट घेऊन तिकीट मिळवण्यासाठी प्रयत्नशील आहेत.

दरम्यान, या शर्यतीत केवळ समाजसेवकच नव्हे, तर ठेकेदार, दोन नंबर धंदेवाले, वाळू माफिया तसेच गुन्हेगारी पार्श्वभूमी असलेले काही जणही निवडणुकीच्या तयारीत असल्याची माहिती मिळत आहे. त्यामुळे पक्षाच्या प्रतिष्ठेला तडा जाण्याची शक्यता असल्याने पक्षश्रेष्ठींच्या डोकेदुखीत भर पडली आहे.

पाचोरा शहरात मतदार वर्ग जागरूक, स्वच्छ प्रतिमेच्या उमेदवाराला देणार पाठबळ

पाचोरा शहरातील मतदार वर्ग अधिक जागरूक होत असून, “स्वच्छ प्रतिमा, जनसंपर्क आणि विकासाभिमुख दृष्टिकोन” असलेल्या उमेदवारालाच मत देण्याचा जनतेत मोठ्या प्रमाणावर कल दिसून येत आहे. “गुन्हेगारी पार्श्वभूमी, भ्रष्टाचार किंवा वादग्रस्त कामकाज” असलेल्या व्यक्तींना तिकीट दिल्यास त्या पक्षाविरोधात नाराजी व्यक्त होण्याची शक्यता कार्यकर्त्यांतून व्यक्त केली जात आहे. त्यामुळे आता नेते जनतेचे ऐकतात की यांना उमेदवारी देतात हे पाहणे महत्वाचे ठरणार आहे. मात्र याचा फटका बसण्याची शक्यता आहे.

पाचोरा : पक्ष श्रेष्ठींची डोकेदुखी वाढली, नेमकी संधी कुणाला

राजकीय सूत्रांच्या माहितीनुसार, या वेळी पक्षश्रेष्ठींकडून “प्रतिष्ठेपेक्षा प्रतिमेला” प्राधान्य देण्याचे संकेत मिळत आहेत. त्यामुळे जरी एखादा इच्छुक नेता पक्षाचा जुना कार्यकर्ता असला तरी त्याच्या प्रामाणिकतेवर आणि जनमानसातील प्रतिमेवरच निर्णय होणार असल्याचे सांगण्यात येत आहे. पाचोरा शहरातील मतदार सध्या उमेदवारांची हालचाल बारकाईने पाहत आहेत. “जनतेत प्रत्यक्ष संपर्क ठेवणारे, शहराच्या विकासासाठी खऱ्या अर्थाने काम करणारे आणि स्वच्छ प्रतिमेचे उमेदवार” यांनाच मतदार यावेळी पसंती देणार अशी चर्चा सध्या जोरात सुरू आहे.

पक्षांतर्गत चर्चांच्या फेऱ्या सुरू असताना, येत्या काही दिवसांत उमेदवारांच्या नावांची पहिली यादी जाहीर होण्याची शक्यता वर्तवली जात आहे. त्यामुळे पाचोऱ्यातील राजकीय वातावरण अधिक तापणार असून, कोणत्या पक्षाकडून कोणाला संधी मिळते हे पाहणे आता उत्सुकतेचे ठरत आहे.

इतर महत्वाच्या बातम्या…

🔴 ब्रेकिंग : गिरणा धरण, सतर्कतेचा इशारा : पाण्याचा विसर्ग वाढविला…

💥 ब्रेकिंग :जळगाव-पाचोरा रस्त्यावर ट्रॅव्हल्स आणि कारचा भीषण अपघात, प्रवासी जखमी तर…

🚨 ब्रेकिंग : भडगाव नगराध्यक्षपदासाठी भाजपाचा उमेदवार ठरला? यांच्या नावाची चर्चा….