🚨 ब्रेकिंग : एकनाथ खडसेंच्या घरात चोरी, सीडी आणि पेनड्राईव्ह चोरीला

हॅलो जनता न्यूज, जळगाव : राज्याचे माजी मंत्री आणि ज्येष्ठ नेते एकनाथ खडसे यांच्या जळगाव येथील बंगल्यात झालेल्या चोरीमुळे राजकीय वर्तुळात खळबळ उडाली आहे. या चोऱीत खडसे यांची अत्यंत महत्वाची कागदपत्रे, सीडी तसेच पेनड्राईव्ह चोरीला गेल्याची माहिती समोर आली आहे. या घटनेनंतर खडसे यांनी थेट सरकारवर आणि पोलिस यंत्रणेवर गंभीर आरोप करत, “ही एक साधी चोरी नसून नियोजनबद्ध कट आहे,” असे विधान केले आहे.

चोरी मागचा हेतू संशयास्पद, खडसेंचा आरोप

पत्रकारांशी संवाद साधताना खडसे म्हणाले, “माझ्या घरात काही महत्वाची कागदपत्रे होती, ज्यात भ्रष्टाचाराशी संबंधित माहिती अधिकारातून मिळवलेली कागदपत्रे देखील होती. ती सर्व कागदपत्रे चोरीला गेली आहेत. बेडरूममध्ये ठेवलेली अत्यंत महत्वाची कागदपत्रे आणि सीडी आता गायब आहेत. कोपऱ्यात पडलेल्या काही जुन्या सीडी तशाच राहिल्या आहेत, म्हणजेच चोरांनी निवडक कागदपत्रेच घेऊन गेली आहेत. त्यामुळे या चोऱ्यामागचा हेतू अत्यंत संशयास्पद आहे.”

खडसेंचे पोलीस यंत्रणेवर प्रश्नचिन्ह…

खडसे यांनी पुढे सांगितले की, “माझ्या घरात चोरी होईल, याची कल्पना सुद्धा केली नव्हती, कारण पोलिसांवर विश्वास होता. पण आता या घटनेनंतर पोलिसांवरच प्रश्नचिन्ह उपस्थित झाले आहे. इतक्या सुरक्षित परिसरात, आणि चौकशी अधिकार्‍यांच्या नजरेसमोर अशी चोरी कशी झाली, हे अत्यंत गंभीर आहे. पोलिसांनी या घटनेचा सखोल तपास करावा आणि चोरांनी नेमकं काय आणि का चोरलं हे समोर आणावं,” अशी मागणी त्यांनी केली आहे.

खडसे यांनी जिल्ह्यात गेल्या काही महिन्यांत झालेल्या चोरी आणि दरोड्यांचा उल्लेख करत म्हटले की, “गेल्या काही काळात जळगाव जिल्ह्यात अशा घटना वारंवार घडत आहेत, आणि पोलिस मात्र त्यावर नियंत्रण ठेवण्यात अपयशी ठरत आहेत. त्यामुळे जिल्ह्यातील कायदा आणि सुव्यवस्थेची स्थिती धोकादायक पातळीवर पोहोचली आहे.”

या प्रकरणाची माहिती मिळताच पोलिसांनी घटनास्थळी धाव घेतली असून, फॉरेन्सिक टीम आणि डॉग स्क्वॉडच्या मदतीने तपास सुरू करण्यात आला आहे. मात्र, आतापर्यंत कोणतीही ठोस धागेदोरे पोलिसांना मिळालेले नाहीत. दरम्यान, या चोऱीच्या घटनेमुळे राजकीय वर्तुळात चर्चांना उधाण आले असून, एकनाथ खडसे यांच्यावर राजकीय डावपेच रचले जात असल्याचा आरोप त्यांचे समर्थक करत आहेत. आगामी काही दिवसांत या प्रकरणाचा तपास कोणत्या दिशेने वळतो, याकडे राज्याचे लक्ष लागले आहे.

इतर महत्वाच्या बातम्या….

🔴 ब्रेकिंग : जिल्हा परिषद, पंचायत समिती निवडणुका पुन्हा लांबणीवर!

🚨 ब्रेकिंग : मंत्री छगन भुजबळ यांना छातीत दुखल्याने रुग्णालयात दाखल, हॉस्पिटलमध्ये उपचार सुरू

🚨 ब्रेकिंग: जळगाव जिल्ह्यातील १४ वाळू घाटांसाठी ई-लिलाव प्रक्रिया सुरू